Iniciativa pol Asturianu celebró'l 25 de marzu la entrega de premios de la primer edición del Concursu de micropoesía "Cola poesía na llingua" (#PoesíaLlingua) qu’entamó pa celebrar en Twitter el Día Internacional de la Poesía. Amás, esti actu sirvió pa celebrar la entrega de diplomes de los VI Cursos d’Asturianu en Xixón, cuntando con delles actuaciones musicales y la presencia del vicepresidente de l’Academia de la Llingua Asturiana, ente otros representantes de les entidaes participantes nes actividaes de la organización.

Al concursu presentáronse más de 200 poemes en 72 hores de plazu abiertu pa ello, con premios populares, votaos polos internautes al traviés del retuitéu de los micropoemes y premios del xuráu, que tuvo formáu polos escritores Lluis Portal Hevia, Enrique Carballeira y el periodista Iván Llera Huerta, faciendo de secretariu Inaciu Galán, presidente d’Iniciativa pol Asturianu.

Ente los micropoemes presentaos col hagstag o etiqueta #PoesíaLlingua los votos de los internautes dieron el primer premiu popular a Iván Rendo Barreiro (@ivanrendo) con 189 retuiteos. Otros diez finalistes enllenen el llistáu de ganadores de los premios populares.

No que cinca a los premios del xuráu, el primer premiu foi p’Águeda Díaz Tuero (@Chandri_) El segundu premiu va entregase a Pablo Rodríguez Medina (@PabloRguezMedin), quedando en tercer llugar Miguel Rojo Martínez (@joegroumil) Por mor de la importante calidá de los poemes presentaos, el xuráu dio otros doce accésits.

A lo llargo del actu hebo emocionantes discursos de los alumnos:

Discursu de Bernardo y Mónica

Discursu d'Estíbaliz, alumna asturmexicana nos cursos

El concursu cuntó col patrociniu d’Algamar Producciones, Asturtoons Editorial, Ediciones Trabe, La Sidra, Pintar-Pintar Ediciones,  Revista Formientu y Suburbia Ediciones, a los qu’Iniciativa pol Asturianu quixo dar el máximu agradecimientu por facer posible los premios d’esti concursu entamáu, como toles actividaes de l’asociación, ensin nengún tipu d’ayuda pública. Tolos premiaos pueden consultase nel archivu axuntáu.

Semeyes del actu

ACTA DEL XURÁU Y MICROPOEMES