Esti llunes 11 de payares de 2013, a les 20 hores, nel Club de Prensa de La Nueva España en Xixón, asitiada nel Monte de Piedá de CaxAstur, xunto a la cai Institutu, va celebrase una presentación de la campaña d'usu del asturianu nes empreses d'Iniciativa pol Asturianu. Esta campaña trabaya pol fomentu del usu de la llingua asturiana n'empreses.
Pa ello cuntaráse cola presencia de miembros de la organización que van mostrar los detalles de la campaña, asina como empreses que yá tán usando l'asturianu y van cuntar la so esperiencia, asina como dar a prebar a los asistentes dalgunos productos gastronómicos etiquetaos n'asturianu, asina como l'amuesa d'otru tipu de productos y materiales n'asturianu.
Convídase al actu a toes aquelles persones que tengan interés por conocer cómo introducir l'usu del asturianu nes sos empreses y negocios. Nel actu podrán conocer les esperiencies positives d'otros empresarios y profesionales.
*Na semeya, Serxu Solares, de Cerveces Bayura, presenta la so esperiencia nun actu anterior organizáu por Iniciativa pol Asturianu.
