Participa nel primer "Alderiques d'Asturies" sobre l'asturianu nos medios dixitales

Espublizao 20/12/13

Güei, vienres 20 d'avientu, a les 20 hores, va celebrase nel llar del Conseyu de la Mocedá del Principáu d'Asturies, nel baxu 10 de la cai Fuertes Acevedo d'Uviéu, un alderique baxo'l títulu "L'asturianu nos medios dixitales anguaño". Esta charra va convertise na grabación del primer programa televisivu "Alderiques d'Asturies", proyectu conxuntu d'Iniciativa pol Asturianu y los diarios dixitales InfoAsturies y Conocer Asturias.

 

Toles persones interesaes n'averase a la grabación van poder participar y facer entrugues a los cuatro convidaos d'esta ocasión, represenantes de medios dixitales d'información y el vicepresidente d'Iniciativa pol Asturianu, Vítor Suárez, que ye tamién blogueru y participa de la xestión de la Uiquipedia n'asturianu.

 

Esta nueva iniciativa ñaz col envís de poner enriba la mesa un asuntu del que charraremos fonderamente con dellos convidaos, nun espaciu presentáu por Samuel Gradín, fechu col oxetivu de sentir estremaes opiniones alredor de custiones qu'afecten a l'actualidá asturiana.

 

Esti proyeutu apruz col firme compromisu d'emplegar la llingua asturiana como vehicular, pa tratar nella cuestiones polítiques, sociales, culturales, etc. del panorama asturianu. L'espaciu fadrá la so apaición pública a lo llargo de les vinientes selmanes al traviés de la rede con esti primer espaciu, que va poder consultase nes canales habituales de les trés entidaes.

Videu destacáu

Protocolu Garantía de los Drechos Llingüísticos

El Protocolu pa la Garantía de los Drechos Llingüísticos ye un documentu internacional que quier ser una continuación de la Declaración Universal de los Drechos Llingüísticos aprobada va agora venti años.