Pablo Xuan Manzano, miembru de l’Academia de la Llingua Asturiana, inauguró los VI Cursos d'Asturianu en Xixón agradeciendo a lniciativa pol Asturianu'l llabor fechu na formación de cientos de persones nel usu del idioma d'Asturies, nun actu nel que tamién participaron Javier Cubero, del Conceyu Universitariu pol Asturianu ya Inaciu Galán, presidente d’Iniciativa pol Asturianu.
L'actu, que se celebró nel Conseyu de la Mocedá de Xixón, cuntó coles pallabres d'apertura de los representantes de les entidaes entamadores de los cursos y con una charra de Manzano, na que faló de la so esperiencia como profesor d'asturianu en tolos niveles formativos, asina como del llabor de l'Academia y de la Fundación Nuberu, que preside.
Los alumnos y alumnes pudieron facer entrugues, abriéndose un interesante alderique alredor de la situación de la llingua asturiana, asina como alredor de la situación politica d'Asturies y la so influencia na situación del idioma.
Iniciativa pol Asturianu valora mui positivamente esta esperiencia formativa que s’entama per sesta ocasión en collaboración cola Academia de la Llingua Asturiana y que tuvo una perbona acoyida, con más de mediu centenar de matriculaos.
Nesta edición hai alumnos matriculaos, que siguen el cursu a distancia al traviés d’una plataforma de cursos en llinia basada en Moodle, dende países como l’Arxentina, Estaos Xuníos o Bélxica. Dellos son asturianos emigraos o fíos d’emigrantes asturianos, pero tamién hai alumnos qu’ensin tener rellación con Asturies quixeron interesase por esta llingua europea cada vegada más conocida internacionalmente. Los cursos cunten con 36 hores llectives y nel casu de los presenciales tán celebrándose los llunes y miércoles pela tarde.
