La vocalía d'Enseñu d'Iniciativa pol Asturianu felicitó y ufrió'l so sofitu a l'Asociación de Mas y Pas del IES Juan José Calvo de Sotrondio (Samartín del Rei Aurelio) pola carta unviada recién a la Conseyera d'Educación quexándose polos recortes del profesoráu d'asturianu y pidiendo que se garantice l'enseñu del idioma en tolos niveles.
Dende Iniciativa pol Asturianu quiximos manifestar al traviés d'una carta unviada por María Díaz Suárez, vocal d’Enseñu d’Iniciativa pol Asturianu, el nuesu apoyu na llucha pol caltenimientu de la ufierta de l’asinatura de Llingua Asturiana en toles etapes educatives.
Y ye que ye necesario recordar que son munchos y mui variaos los inconvenientes a los que los alumnos y docentes de Llingua Asturiana tienen qu’enfrentase cuasi a diariu, ente ellos la gran falta d’apoyu institucional a pesar de les bones pallabres de la conseyera d’Educación pa con ellos.
Por eso queremos reiterar el nuesu apoyu a la iniciativa d'esta AMPA y de toles que n'Asturies trabayen cada día, demostrando'l verdaderu sofitu social al idioma nel sistema educativu per parte de les families.
