La reclamación del usu del asturianu nos autobuses d’Uviéu llegará al plenu

Iniciativa pol Asturianu unvió una quexa al Conceyu d'Uviéu va delles selmanes, n'ella la organización amosaba'l so refugu a la esclusión de la llingua asturiana en toles estayes del grupu Transportes Unidos de Asturias S.A. (T.U.A.), qu’ufre’l serviciu públicu de tresporte d’autobús nel conceyu de la capital, y que ta acabante d’estrenar un nuevu web y llínies de serviciu. La quexa facíase llegar tamién a tolos grupos políticos representaos nel plenu d'Uviéu, recibiendo la respuesta del grupu d'Izquierda Xunida, qu'agora lleva'l tema al plenu.

La iniciativa inclúi dos propuestes, l'usu del asturianu nes llinies d'autobuses urbanos y la petición de que TUA faiga esta propuesta al Consorciu de Tresportes d'Asturies, del que forma parte dende va unos meses.

Iniciativa pol Asturianu agradez a Izquierda Xunida que lleven esta propuesta al plenu y piden a los grupos políticos que la sofiten y aprueben, pa da-y visbilidá al asturianu nesti serviciu públicu que tanta incidencia tien ente los ciudadanos.