Teresa Sanjurjo González, Direutora de la Fundación Príncipe d'Asturies, aconceyará con miembros d'Iniciativa pol Asturianu en feches próximes. La Fundación púnxose en contactu con Iniciativa pol Asturianu pa solicitar esti conceyu dempués de que la organización escribiera apocayá a esta institución pa reclama-y l'usu del asturianu nes sos actividaes y na so páxina web, onde usen más d'once llingües, pero non l'asturianu. 

Y ye que pa Iniciativa pol Asturianu ye d’especial relevancia que la “Fundación Príncipe de Asturias” nun use l’asturianu en nenguna de les sos actividaes mientres la otra fundación del Príncipe, la Príncipe de Girona, inclúi una versión en catalán como páxina principal y un llogotipu billingüe en castellán y catalán.

Iniciativa pol Asturianu reclamara  al traviés de la carta unviada al so Presidente y a la Direutora, un cambiu nesta política de marxinación de la llingua asturiana qu’exerce la entidá, y per esi camín van empobinase les propuestes que presentará nel conceyu agora convocáu ente les dos entidaes. Iniciativa pol Asturianu espera que d'esti aconceyamientu xurda un compromisu de la Fundación d’implicase na normalización y promoción del asturianu.