 23.15.34_3.png)
Estos díes atrás pudimos ver como dende dalgunos sectores políticos y mediáticos tiraben a dar contra la presencia de la llingua asturiana nel sistema educativu. Les reformes que se tán faciendo cola nueva llexislación fueron la xida pa ximelgar l’árbol y ver si consiguíen que l’asturianu diera unos pasos atrás.
La nueva llei nun supón nengún avance pal idioma que pudiera xustificar ciertu nerviosismu nestos sectores, sinón que, pela cueta, supón un situación tovía más probetaya pa la llingua asturiana en primaria, que pasa de nun competir con nada a tener a Cultura Asturiana, una asignatura en castellán, como alternativa.
Na sociedá asturiana yá naide a quien la xente tome en serio pon en dulda la realidá billingüe d’Asturies, los asturianos y asturianes sofiten decididamente l’usu del asturianu: con audiencies na televisión n’asturianu, con más d’un 60% de neños matriculaos en Llingua Asturiana, etc. Namás unes poques persones siguen nel “bunker” contra l’asturianu, pero dalgunos d’ellos son persones con munchu poder mediáticu y por tanto, capacidá de manipulación.
La parte más positiva de los llamentables fechos d’estos díes, foi ver una sociedá civil, y non solo al sector más tradicional asturianista, respondiendo con unidá y contundencia democrática a esti ataque: partíos políticos, sindicatos, asociacionismu, asociaciones de padres y madres…
La propuesta del Partíu Popular d’enfrentar al asturianu con una llingua estranxera en primaria, que tán desastrosos resultaos tuvo pal idioma en secundaria, nun cuenta col sofitu de nenguna fuercia política de pesu, y quedará pa prau. Pero ye un avisu de los ataques que pueden venir.
L’asturianu ye güei un patrimoniu de toos y toes y una reivindicación asumida con normalidá por tou tipu de colectivos, por partíos de tolos ámbitos políticos, por sindicatos, families… y nun vamos dexar que dean marcha atrás a los pocos pasos afitaos nestos primeros trenta años de presencia del asturianu nel sistema educativu.
Pero, cuidáu, namás con un siguimientu continuáu d’estes cuestiones, respondiendo con axilidá ya intelixencia a estos ataques, sedremos quien a evitar que los prexuicios contra l’asturianu ganen la batalla. Toca facer didáctica na sociedá, pa esplicar a los asturianos que nun ta reñío deprender lo propio con otros conocimientos, y que ye importante y útil pa los sos fíos, conocer la so llingua, la llingua na que s’espresa la so cultura y que vertebra la identidá d’Asturies.
