Esti mes presentamos la campaña “La empresa asturiana muévese”, qu’inclúi una marca de calidá llingüística cola que queremos afalar al usu del asturianu nel etiquetaxe de productos y en xeneral, nos negocios. Pa Iniciativa pol Asturianu les empreses son parte imprescindible del procesu que tien que llevanos a un futuru meyor pal asturianu. Les empreses, como elementu imprescindible de la economía, xeneradores de riqueza y de puestos de trabayu, han tener tamién un compromisu col territoriu nel que desenvuelven la so actividá. 


Usar l’asturianu nes sos actividaes, etiquetando los productos, na páxina web de la empresa, na cartelería de los establecimientos… xenera espacios de normalidá pal asturianu, esto ye, aumenta los espacios nos qu’usar l’asturianu ye normal, y polo tanto ayuda a protexer esti ricu patrimoniu cultural, identitariu y económicu.

Pero tamién entendemos que l’asturianu ye una oportunidá de da-y un plus a los negocios, de ser más atractivos pal públicu asturianu y tamién pal de fuera. Los productos etiquetaos n’asturianu son facilmente identificables como “fechos en casa”, y queremos trabayar pa que les asturianes y los asturianos consuman cada vegada más productos etiquetaos n'asturianu. 

L’asturianu ye, y cada vegada más, marca de calidá, denomación d’orixe del productu, señal de que xenera riqueza y trabayu equí, en casa, y queremos convidar a empreses de tol país a sumase a les munches empreses que yá usen l’asturianu con ésitu, porque creemos que l’asturianu saldrá ganando, pero la empresa tamién.

Agora queremos que se conozan les oportunidaes que pue dar esta llingua a los negocios y los consumidores tenemos muncho que dicir, solicitando onde consumimos qu’usen l’asturianu. Ye’l momentu d’informalos, dende Iniciativa pol Asturianu van tener tol sofitu pa facelo. Ente toos vamos siguir creando espacios onde vivir n’asturianu seya normal.

Artículos venceyaosMás del autor