Estos díes atrás dellos de vosotros y vosotres, alcaldes y alcaldeses, conceyales, diputaos y diputaes asturianos, xurastis el cargu qu’entamáis a exercer agora. N’alredor de 24 conceyos, decenes de conceyales y dos alcaldes, amás de dellos diputaos, ficístislo n’asturianu o en gallego-asturianu, ensin importar el partíu o’l posicionamientu ideolóxicu, usando l’asturianu como lo que ye, el patrimoniu cultural ya identitariu de tolos asturianos y asturianes.
Esti xestu merez la nuesa felicitación, pero nun pue quedar namás neso, nun xestu, sinón que tien de ser l’entamu de más iniciatives que dean los pasos necesarios pa facer de la nuesa llingua, una llingua normal nes Cases de Conceyu d’Asturies y nel parllamentu.
Agora facemos un llamáu a los representantes de los asturianos nos Conceyos y na Xunta Xeneral pa que faigáis del asturianu una llingua con futuru. Tais de xuru énte munchos retos que los ciudadanos vos reclamen, pero l’asturianu nun pue quedar relegáu por ello. Ye importante trabayar y facer normal esta llingua en tolos ámbitos posibles, y vosotros, dende l’aliminstración, podéis facer abondo.
Ye importante poner en marcha planes de normalización, tanto nos Conceyos como nel ámbitu autonómicu, qu’entren en funcionamientu enantes de que termine l’añu. Amás, los 942 conceyales, 78 alcaldes y 45 diputaos, podéis cuntar con Iniciativa pol Asturianu non solo pa presentar propuestes sinón p’ayudar a xenerar consensos y sacales alantre.
Queremos ser una ferramienta pa que se dean pasos importantes y pa que nun s’escaeza l’asturianu hasta que toque xurar el cargu otra vuelta dientro de cuatro años. Queremos vivir n’asturianu y nesto los represenantes políticos tenéis la responsabilidá principal. Contái con nós, contái colos ciudadanos, porque podéis tar seguros, valoren y aprecien que los sos represenantes tengan tamién ente les sos esmoliciones y acciones de gobiernu, protexer y normalizar la so llingua propia.
