Un rapaz va a la comisaría a renovar el DNI y pide que se cumpla la llei nel mesmu, que’l nome del so pueblu seya’l que ye na llegalidá vixente: Llangréu, nesti casu, pero pasa en munches ocasiones, silenciaes les más d’elles.
Una madre quier matricular a la so fía na asignatura d’asturianu y vive’l calvariu de tener qu’enfrentase a la dirección del centru onde estudia la rapaza. Pasó en Xixón, pasa en Mieres, pasa en tantos sitios y pasa cada añu.
Y hailos que tovía falen d’un caprichu, d’una especie d’entretenimientu que dalgunos tenemos en molestar a les instituciones, ensin entender qu’esta ye una cuestión de drechos civiles como ciudadanos, de Drechos Humanos como persones, una cuestión recoyida na llexislación y qu’obliga a les instituciones a cumplir.
Esta situación lleva demasiao tiempu ensin igua y ye una vergoña pa la sociedá asturiana, un importante déficit democráticu al qu’hai que-y poner solución. Namás queremos vivir n’asturianu, namás queremos el drechu a ser un ciudadanu o una ciudadana más, que nun tien que pelear cada ocasión pa poder vivir, porque ye insoportable y ye inxusto.
