La nuesa propuesta d’entruga al Ministeriu de Fomentu sobre l’usu incorrectu de la toponimia oficial asturiana nes carreteres del Estáu n’Asturies. Que llevó al Senáu Izquierda Xunida, recibió la respuesta negativa de Fomentu. Pal Ministeriu, la falta d’oficialidá del asturianu ye razón pa xustificar que nun usen los nomes de llugar oficializaos. L’argumentu nun tien sentíu nengún y nun ye más qu’una mala escusa ensin base xurídica.
Sicasí, esta contestación, siendo negativa, amuesa que’l diálogu coles fuercies polítiques nun ye solo útil sinón imprescindible, una ferramienta que pue dar perbonos resultaos. Gracies a esta propuesta, el Gobiernu d’Asturies reclamó al d’España qu’use la toponimia oficial. Que’l Gobiernu d’Asturies se responsabilice na defensa de la toponimia aprobada pola mesma alministración, ye un cambiu positivu. Agora bien, tovía queda muncho pa qu’ésti pueda presentase como un exemplu nel usu correctu de la toponimia asturiana oficializada.
Va años que dende Política Llingüística se fala de la robla d’un alcuerdu col Gobiernu d’España de cara al usu de la toponimia asturiana en tolos ámbitos, pero entá nun se llevó alantre esta propuesta. Amás, el procesu d’oficialización vive un importante parón, tovía queden una llarga riestra d’ellos por oficializar los sos nomes, y habría que dar puxu a esti procesu, que lleva en marcha cuasi un década.
De contino habremos de tar sollertes a los pasos atrás que puedan dase, como asocedía en Xixón meses atrás cola toponimia nos autobuses, una situación a la que pudimos dar solución gracies a la nuesa quexa. Nesti campu de la reivindicación, como en tolos demás, tenemos de trabayar por consiguir avances, pero tamién por evitar retrocesos.
