Esti mes celebróse la Selmana de les Lletres Asturianes. Como cada añu’l Gobiernu d’Asturies organiza delles actividaes alredor de la nuesa lliteratura que sirven pa da-y promoción al nuesu idioma, pero que nun se correspuenden con un trabayu contináu a lo llargo del añu.

La lliteratura asturiana, como l’idioma nel que s’espresa, precisa d’una política decidida de sofitu. Y nun tamos falando de que se precisen munches perres, sinón un pocoñín de voluntá.

La presencia de cargos institucionales a lo llargo de la Selmana de les Lletres Asturianes ye mui probe. Nun vimos al presidente Javier Fernández participando de nengunu de los actos y la mayoría de los alcaldes asturianos permanecen ayenos a estes celebraciones.

Pa que la situación de la lliteratura asturiana acabe por profesionalizase ye necesario trabayar dende la base, pa crear un públicu llector nes escueles; na promoción, con una presencia munchu más importante nos medios de comunicación, n’especial los públicos; y na internacionalización de la nuesa lliteratura, con una política que trabaye pa dar a conocer a los nuesos escritores y p’afalar que la so obra se traduza a otres llingües y se dea a conocer acullá de les nueses llendes.

Los premios lliterarios que convoca la Conseyería de Cultura habríen de convertise nun actu verdaderamente importante na axenda cultural asturiana. Los Premios Príncipe d’Asturies son tamién un eventu nel que, de tener voluntá, podría aprovechase la presencia de figures internacionales de la lliteratura, pa facer actos nos que se conxugara lo meyor del la lliteratura’l país y lo más conocío internacionalmente, como propunximos nel últimu alcuentru cola Fundación Príncipe apocayá.

En xeneral, les nueses Lletres precisen que les bones pallabres que se dicen pa con elles nel tiempu de la Selmana les Lletres lleguen a facese realidá con fechos el restu l’añu. Fechos que daveres "dibuxen el camín", como titulaben esti añu a la Selmana, hacia una llingua y una lliteratura asturianes normalizaes dafechu na sociedá.