Nesti mes de mayu volvimos a salir a la cai Uría d’Uviéu pa reclamar la reconocencia del estatus d’oficialidá pa la llingua asturiana y ficímoslo con una llarga riestra d’años al llombu nesta xusta reivindicación.
La reclamación de la oficialidá ye necesaria, y salir a la cai nel Día de les Lletres pa facela visible ye importante, pero tenemos que conciencianos de la necesidá de que cada día tien que ser un Día de les Lletres Asturianes.
Necesitamos que miles d’asturianos reivindiquen un futuru pal idioma dándo-y presencia nel presente, cada día y con normalidá nel so ámbitu social, reclamando’l so usu en tolos ámbitos de la vida, convirtiéndose n’activistes del idioma. Namás con usar la llingua asturiana nel día a día, nel trabayu, cola familia, colos collacios, tamos faciendo un importante llabor de difusión y normalidá.
Pero amás, tu, que defendes l’asturianu o simpatices cola causa, tienes qu’implicate, porque nun queda otra. Porque necesitamos munches manes trabayando. Hai munchos pasos alantre pendientes de dar por falta de persones que s’impliquen. Nun necesitamos grandes llabores, pero sí xente que dedique una hora al día, a la selmana, al mes, caún coles sos posibilidaes. Nun basta con salir cada primer vienres de mayu a la cai pa manifestase, necesitamos la to implicación, necesitamos 365 díes de les Lletres.
