La Xunta Xeneral trabaya na redacción y aprobación de la nueva llei que regule’l sector públicu audiovisual. Nesti nuevu testu, ye imprescindible que se recueya una política clara no que cinca al papel que tienen que xugar los medios públicos nel llabor de normalización del asturianu.

Una llei que recueya’l mandatu del Estatutu d’Autonomía d’Asturies, que ye claru “promoveráse l’usu (del asturianu) nos medios de comunicación”. La llingua asturiana tendría munchos más puntos pa salvase, con una llei audiovisual que dexara claru un camín hacia una radiotelevisión pública n’asturianu, con especial urxencia d’una programación informativa, infantil, cinematográfica y deportiva n’asturianu.

La RTPA sigue dando pasos, emburriada pola demanda social que demuestren les bones audiencies, y pol consensu qu’esiste na sociedá. Si tien sentíu una radiotelevisión pública asturiana y nun queremos atopanos con una desconexón de la sociedá con ella, habrá ser un mediu públicu onde la llingua asturiana seya la llingua normal d’espresión del mesmu.

Nesti camín Iniciativa pol Asturianu sumóse al impulsu al manifiestu “Cinco puntos por unos medios públicos al serviciu d’Asturies”, onde más de trenta organizaciones collaboren yá pa reclamar que la llingua asturiana y la cultura d’Asturies tengan el protagonismu que merecen na nuesa radio y televisión.

La responsabilidá ta agora en manes de los parllamentarios asturianos, que tienen l’importante papel de construyir les bases pa una radiotelevisión que normalice l’asturianu, que seya un espeyu onde los asturianos se vean reflexaos.