L’editorial d’ochobre: La hora la verdá

Espublizao 30/10/15

Nel mes de xunu munchos conceyales, y dellos diputaos y alcaldes, xuraron el cargu n’asturianu o en gallego-asturianu. Un xestu que celebramos y pol que los felicitamos. Agora, cuasi mediu añu dempués ye la hora la verdá, la hora d’analizar qué tán faciendo pola normalización del idioma nes sos respectives responsabilidaes. Y ye tamién el momentu de que los ciudadanos y ciudadanes reclamemos que los programes en política llingüística se lleven alantre. 

 

Les midíes que s’aprobaron na Xunta Xeneral como refuerciu de la Llei d’Usu del asturianu de 1998 han cumplise nos próximos meses y vamos tar sollertes. 2016 tien de ser un añu nel que se visibilice un cambiu de verdá nel usu del asturianu per parte de les instituciones públiques. Lo contrario sedrá un fraude nes promeses feches, especialmente per parte de los partíos que llevaron nel so programa la propuesta de facer oficial la llingua asturiana.

 

Los Conceyos gobernaos por estos partíos o aquellos nos que concidicionaren otros gobiernos, han ser especialmente exemplares nel usu y normalización del idioma. En tolos ámbitos, non nel requexu que ye en munchos casos la cultura, con avances nos drechos de los ciudadanos, con visibilidá pal idioma en tolos espacios, con planes de normalización que garanticen una programación y una claridá nos oxetivos, pa poder dempués valorar lo consiguío. Agora ye la hora de demostrar les promeses y les voluntáes, ye la hora la verdá.

Videu destacáu

Protocolu Garantía de los Drechos Llingüísticos

El Protocolu pa la Garantía de los Drechos Llingüísticos ye un documentu internacional que quier ser una continuación de la Declaración Universal de los Drechos Llingüísticos aprobada va agora venti años.