L'editorial d’avientu: el futuru del asturianu

Espublizao 21/12/12

 

El diariu El Comercio tien abiertu estes selmanes atrás un interesante alderique alredor del futuru del asturianu, qu’entamaron con un artículu Alfredo Ignacio Álvarez Menéndez y los hermanos Ramón y Vital d’Andrés. La cuestión, el futuru del asturianu, ¿qué queremos los asturianos que pase col idioma de nueso d’equí a unos años?
 

L’asturianu dio pasos como llingua d’usu simbólicu, ganando espacios, pero’l so usu diariu baxa y baxa, perdiendo falantes a gran velocidá. Esto demuestra un fracasu nes escases polítiques entamaes polos gobiernos d’Asturies dende la llegada de la democracia y tenemos de pidir responsabilidaes y sobre manera, un cambiu radical. El movimientu de reivindicación llingüística, sabe cómo facelo, y lleva décades ufriendo a los gobiernos les ferramientes pa ello.

 

Nun somos la única llingua del mundu en peligru, ye más, la mayoría de les cerca de 7.000 qu’esisten tán en peligru, pero munches consiguen recuperase y namás tenemos que buscar el modelu más afayadizu pa la nuesa sociedá.

 

¿Y la xente, les asturianes y los asturianos, tamos faciendo abondo? Ye obvio qu’un procesu de normalización d’una llingua necesita de la población y el so compromisu pa funcionar. Hai muncha xente que lleva munchos años y otros que van sumándose cada día al compromisu de trabayar pol futuru del idioma, usándolu cada día na so actividá.

 

La sociedá asturiana tien parte de la responsabilidá de la situación mala que vive l’idioma, pero nun podemos escaecer que la xente que trata d’usar l’asturianu n’ámbitos públicos recibe de contino toles dificultaes posibles per parte de l’alministración, llegando en munchos casos a situaciones de represión y marxinación. De forma, que, d’alcuerdu que podemos y tenemos que pidir más compromisu a la sociedá asturiana, pero recordemos que dende’l poder, siguen poniéndose munches torgues a esti usu, y que namás con un colectivu fuerte y xuníu que dea sofitu a estes persones podremos avanzar. Por eso ye mui necesario que les persones más conciencies se pongan al llabor y collaboren, les puertes d’Iniciativa pol Asturianu tán abiertes pa ellos, aguardando poder llegar cada vegada a más ámbitos sociales.

 

Iniciativa pol Asturianu cumplió yá un añu de la so presentación pública y facemos un balance bonu del llabor, anque’l balance que mos esmolez davares nun ye’l de la nuesa actividá, sinón el de los pasos que consigamos dar pa que l’asturianu tenga futuru, un futuru como ferramienta de comunicación, seña d’identidá y fuerte patrimoniu cultural y económicu de toos. Y nesi llabor vamos siguir trabayando. 

Videu destacáu

Protocolu Garantía de los Drechos Llingüísticos

El Protocolu pa la Garantía de los Drechos Llingüísticos ye un documentu internacional que quier ser una continuación de la Declaración Universal de los Drechos Llingüísticos aprobada va agora venti años.