Cuando aportamos a la editorial númberu cincuenta, delles bones noticies, simbóliques pero positives, atrópense alredor del asturianu. Sigue apaeciendo l'usu del asturianu nel ámbitu publicitariu, cada vegada con más puxu, n'empreses de fuera d'Asturies les más de les ocasiones, pero tamién agora, por exemplu dende la Denominación d'Orixe de la Sidra, que por fin, usa l'asturianu nuna campaña, poco tiempu dempués de qu'una empresa cervecera viniere a Asturies a danos un exemplu usando l'asturianu nel 100% de la so campaña promocional equí, ensin escaecer tamién a les munches empreses pequeñines que lleven años usando l'asturianu con ésitu, y que son exemplares.
La Universidá d'Uviéu entama a faer visible l'asturianu nel propiu nome de la institución o nel so puestu na Feria Muestes, onde tamién tuvo presencia l'asturianu per primer vegada nos espacios de los Conceyos de Xixón y Uviéu, ente otros.
Lo qu'habría ser normal dende va décades vamos consiguiéndolo pasu ente pasu y con munchu esfuerciu y hai qu'aprovechar esti impulsu pa que más empreses, comercios, instituciones, xeneren cada vegada más espacios de visibilidá y prestixu pal idioma. Remata'l branu y entama un nuevu ciclu políticu nel qu'habrá munches oportunidaes pa llograr avances pal usu del asturianu, pa los drechos de los falantes y pa la so visiblidá.
Nestos tiempos que pueden ser positivos, ye cuando más xente ye necesario pa bregar pol idioma. Nun podemos quedar en casa esperando a qu'asocedan los avances, hai que trabayar na concienciación, convencer a cada vegada más xente, animar a los comercios onde mercamos a usar l'asturianu, a los collacios a dir a cursos d'asturianu o a matricular a los fíos na asignatura d'asturianu. Cincuenta editoriales dempués, siguimos animando a tomar la iniciativa pol asturianu, porque ye la única manera de da-y futuru a esta llingua.
