Estes selmanes conocimos la decisión del Gobiernu d’España, al traviés del so delegáu n’Asturies, Gabino de Lorenzo, de reclamar al Conceyu de Carreño la derogación del Plan de Normalización que tán acabante aprobar nel plenu.
Los argumentos xurídicos remanaos pol gobiernu central nun tienen nenguna base real y son una xida pa siguir atacando al asturianu y quiciabes desviar l’atención d’otres cuestiones menos cómodes. Esti ataque ye tamién una forma de poner n’avisu a los munchos proyectos qu’alredor de la normalización del asturianu tán surdiendo nos Conceyos d’Asturies y que nun presten a Delegación del Gobiernu.
Ye’l momentu pa que los Conceyos respuenda con contundencia a esti tipu d’ataques y seyan exemplu d’instituciones cercanes a la ciudadanía y polo tanto qu’usen la llingua de la xente. Ye’l momentu de que reclamemos a los nuesos conceyales y alcaldes un usu normalizáu del asturianu y una visibilización del idioma en tolos ámbitos de l’alministración llocal. Tienen competencies pa ello, tienen profesionales preparaos na mayor parte los casos, y pueden dase pasos grandes ensin necesidá d’inversiones significatives.
Nos últimos venti años los pasos más importantes en política llingüística, anque insuficientes, vienen dándolos precisamente los Conceyos. Ye na so actividá onde podemos atopar una mayor presencia del asturianu, anque hai muncha desigualdá ente l’usu que faen unos y otros. Precisamos una mayor ambición nes midíes y una urxencia na aplicación. Lleven munchos años allargando esti procesu de recuperación d’espacios sociales pal asturianu, y nun hai yá más tiempu que perder.