El xueves 28 celebróse en Litografía Viña, en Cimavilla, Xixón, l'actu d'entrega del II Concursu de Microrrellatos y Micropoemes Musa Cafeína, col que collaboró Iniciativa pol Asturianu. L'actu, presentáu por Ana Lamela, tuvo numberoses referencies a la llingua asturiana, que nesta segunda edición del certame estrenaba la so presencia gracies a la collaboración puesta en marcha ente Musa Cafeína ya Iniciativa pol Asturianu.
Nel actu presentóse'l llibru colos testos ganadores del II Concursu, qu'inclúi los testos ganadores en llingua asturiana. Un llibru preparáu por Litografía Viña, como esplicó la so responsable, Marta Fermín, qu'abrió l'actu recordando la introducción del asturianu nes bases del mesmu "Préstame muncho que l'asturianu tenga presencia, paezme mui importante puxar por ello".
Ana Lamela destacó tamién la presencia del asturianu y agradeció a Iniciativa pol Asturianu'l sofitu pa facelo posible. Inaciu Galán, presidente d'Iniciativa pol Asturianu, intervieno nel actu pa entregar unu de los premios y aprovechó pa felicitar a Musa Cafeína por tomar la iniciativa d'introducir l'asturianu nel premiu y p'animalos a siguir collaborando cola entidá en más actividaes lliteraries y artístiques.
Los ganadores del concursu fueron, na estaya de Micropoemes n'asturianu: “Dubia”, de Berto García, de Corvera, que demientres la entrega agradeció la presencia del asturianu y vióla "como un pasu más nel camín a la necesaria oficialidá de la llingua asturiana". Na estaya de Microrrellatos n'asturianu la ganadora foi Naomi Suárez González por “Los tos zapatos azules”. L'autora polesa dio les gracies pol premiu y agradeció que l'asturianu tuviere espaciu nel concursu "mientres n'otros ámbitos s'empeñen en negar esa presencia a la nuesa llingua".
Amás dióse accésit al micropoema n'asturianu: “Puerta”, de Berto García y foi accésit en microrrellatos n'asturianu: “Traces nel calendariu, de Xuan X. Porta Allende, y “Furacu”, d'Alfredo Garay Menéndez, de Cuideiru.
Los ganadores recibieron exemplares del llibru y de la revista Formientu, que tamién collaboraba nesta edición del concursu.
