El miércoles 16, Iniciativa pol Asturianu tuvo presente na conferencia nomada “Radiodifusión en Llingües Minoritaries: Ónde Tamos, Ónde Debíemos Dir”, entamada pola Alianza Llibre Europea.



La conferencia, cellebrada en Parllamentu Européu, organizóse por mor de la resolución del Parllamentu Européu del 11 septiembre sobre polítiques pa llingües rexonales, minoritaries y indíxenes. Nesti eventu, representantes d’organismos internacionales como’l propiu Parllamentu, la UNESCO o la Rede Europea de Llingües en Peligru (ELEN) amosaron la realidá que les radios comunitaries y comerciales tan sofriendo anguañu n’Europa no que cinca al usu de llingües minoritaries.

Iniciativa pol Asturianu foi convidada a la conferencia como resultáu del so proyeutu de radio ‘Iniciativa pol Asturianu nes ondes’, una iniciativa de radiodifusión consistente nun programa de radio selmanal presentáu por Samuel Gradín y lluéu emitíu per numberoses radios nel país, y que convirtióse yá nunu de los mayores ésitos na radiodifusión n’asturianu nos caberos años.

A lo cabero, la conferencia premitió non solo amosar la dura realidá que l’asturianu y otres llingües minoritaries tan viviendo no tocante a la so presencia en medios de comunicación, sinon qu’amás permitió establecer y fortalecer llazos con otres comunidaes europées como Irlanda, Escocia, Bretaña, Transilvania, Friuli, Cataluña o’l País Vascu, qu’a vegaes puen sofrir problemes asemeyaos a los que nós esperimentamos na nuestra tierra.

Pues ver la sesión matutina equí (debio a la presencia de traductores simultáneos, el videu nun cunta con sotítulos pa les persones que falaron vascu, húngaru o corsu)

 

Videu d'una de les intervenciones de Xosé B. Álvarez nel Parllamentu Européu (inglés con sotítulos n'asturianu)

 

Entrevista a Xosé B. Álvarez sobre la visita