Dende Iniciativa pol Asturianu queremos valorar positivamente la voluntá, espresada por unanimidá nel Conseyu, d'incluyir nesti muérganu a toles asociaciones que tamos trabayando polos derechos llingüísticos en Xixón y n'Asturies.
El muérganu contaba hasta agora con representantes de los partíos, sindicatos y otres organizaciones presentes en Xixón, p’asesorar al Conceyu na fechura de la política llingüística, pero non con asociaciones específicamente del ámbitu de la defensa del idioma. Iniciativa pol Asturianu sumóse, xunto a les demás organizaciones, a la propuesta d'una nueva redaición de los estatutos que-yos dea voz y votu n'igualdá de condiciones. Asina, pasaríase de tener dos representantes en total a un mínimu d'unu por organización lo que-y daría más pluralidá al Conseyu Asesor.

D'esta miente, Iniciativa pol Asturianu va collaborar nesta redaición nueva coles sos propuestes pa lo qu'animará, amás, a tola so militancia a presentar les consideraciones qu'estimen oportunu.

Nesti primer conceyu nel que la organización participó, los representantes d'Iniciativa pol Asturianu ficieron delles intervenciones, ente otres pa reclamar al conceyal responsable de les competencies de Política Llingüística que dea avisu a la empresa de tresporte del conceyu, EMTUSA, que los autobuses vuelvan a usar la toponimia oficial, que despaeció de les sos cabeceres nos meses últimos, asina como un pidimientu pa que'l festival Xixón de Sidra recupere'l topónimu "Xixón" y use l'asturianu, yá que na promoción de la edición que van entamar dientro de pocos díes yá se tán viendo pasos atrás nel usu del asturianu.
Dende'l Conseyu espresóse tamién la voluntá de siguir convidándonos a toles próximes xuntes y aceptamos gustósamente'l brinde, yá que consideramos que ye un foru nel que ye imprescindible la presencia.

Artículos venceyaosMás del autor