Iniciativa pol Asturianu va participar na Manifestación pola Oficialidá esti sábadu 21 d'abril

Espublizao 13/04/18

La entidá anima a tola sociedá asturiana a movilizase'l sábadu 21 nes cais d'Uviéu nesta manifestación entamada pola Xunta pola Defensa de la Llingua Asturiana

Esti sábadu 21  d'abril los asturianos y asturianes vamos volver a salir a la cai pa reivindicar la reconocencia del estatus llegal d'oficialidá pal idioma. Dende Iniciativa pol Asturianu sofitamos esta manifestación, participando de la marcha y animando a tolos nuesos socios y socies, simpatizantes y en xeneral, a la sociedá asturiana, a llevantar la voz pola so llingua, que carez tanta necesidá d'acción per partes de les alministraciones, asina como polos falantes, que siguen ensin ver los sos drechos civiles básicos reconocíos.

Iniciativa pol Asturianu ye una organización que ñació pa implicar a tola sociedá asturiana nel procesu de recuperación y normalización del asturianu, y polo tanto camienta imprescindible que la sociedá s’implique y faiga oyer la so voz, que ye mayoritariamente favoratible a que l’asturianu se convierta nuna llingua normal, que pueda usase en tolos ámbitos y que tenga garantizáu’l so futuru, lo que solo ye posible si esta llingua ye oficial.

La Manifestación pola Oficialidá va salir el sábadu 21 d'abril a les 12:00 hores de la Estación del Norte d'Uviéu. Animamos a toles persones enfotaes nel futuru del idioma a participar con nós na manifestación organizada pola Xunta pola Defensa de la Llingua Asturiana y na que van participar una montonera de sectores de la sociedá asturiana, de forma tresversal.

Pa facilitar la organización del nuesu grupu na Manifestación pidímosvos que si queréis venir con nós y collaborar llevando pancartes o otros elementos, faigáis inscripción nesti formulariu

Videu destacáu

Protocolu Garantía de los Drechos Llingüísticos

El Protocolu pa la Garantía de los Drechos Llingüísticos ye un documentu internacional que quier ser una continuación de la Declaración Universal de los Drechos Llingüísticos aprobada va agora venti años.