Iniciativa pol Asturianu ufre places de práctiques d'alcuerdu cola Universidá d'Uviéu

Espublizao 14/04/14

Iniciativa pol Asturianu y la Universidá d'Uviéu roblaron va dellos meses un Conveniu de Coperación Educativa ente dambes entidaes, col envís de qu'Iniciativa pol Asturianu acueya na so organización a alumnos en práctiques de cualesquiera de les titulaciones de la universidá asturiana. La organización ta agora en cata de persones interesaes en sumase al equipu de trabayu de la organización demientres el so periodu de práctiques obligatories de Grau.

Iniciativa pol Asturianu busca cuntar cola collaboración d'alumnáu de la Universidá d'Uviéu, al mesmu tiempu que-yos ufre una granible esperiencia nel campu de la xestión de la reivindicación llingüística, con proyectos personalizaos pa llevar alantre acordies col campu de la formación del alumnu.

Los alumnos interesaos en facer el so periodu de práctiques n'Iniciativa pol Asturianu pueden ponese en contactu cola organización nel corréu contautu@iniciativapolasturianu.org o nes canales habituales de comunicación, en web y redes sociales.

La organización busca persones de tolos perfiles académicos, pa implicase nes distintes xeres que se desenrrollen en cauna de les estayes: alministración, prensa, ayalguería, rellaciones internacionales, empresa, etc. La organización ta dispuesta tamién a la robla de convenios asemeyaos pa poder acoyer a alumnos que provengan d'otres universidaes o centros de formación profesional.

Videu destacáu

Protocolu Garantía de los Drechos Llingüísticos

El Protocolu pa la Garantía de los Drechos Llingüísticos ye un documentu internacional que quier ser una continuación de la Declaración Universal de los Drechos Llingüísticos aprobada va agora venti años.