Iniciativa pol Asturianu y la compañía Appsturias roblaron un conveniu de collaboración pa intentar normalizar y fomentar l'usu del asturianu nes nueves tecnoloxíes. L'alcuerdu inclúi'l compromisu per parte de la compañía d'ufrir facilidaes y descuentos a les persones y entidaes que pongan en marchar aplicaciones pa móviles n'asturianu.  

Inaciu Galán, presidente d'Iniciativa pol Asturianu, y Javier López, xerente d'Appsturias, señalaron que l'alcuerdu nun ye una declaración d'intenciones, sinón que cunta yá con un plan bien definíu d'actuación, incluyendo descuentos pa les aplicaciones con versión n'asturianu, asina como un descuentu estra pa los socios d'Iniciativa pol Asturianu. Pela parte d'Iniciativa pol Asturianu va collaborase cola empresa en cuestiones d'asesoramientu llingüísticu.

Pa Iniciativa pol Asturianu esti camín de collaboración con empreses ye bien importante y unu de los pegoyos del trabayu pola normalización del asturianu. Un sector socioeconómicu que funcione n'asturianu y una sociedá concienciada na necesidá de consumir n'empreses qu'usen l'asturianu con normalidá, ye imprescindible pa da-y futuru a la llingua asturiana.

Esta ye una de les primeres empreses coles qu'Iniciativa pol Asturianu robla estos convenios, anque tán en procesu otros convenios colos que se quier siguir alantre nesti ámbitu. Les empreses interesaes pueden ponese en contactu cola entidá pa collaborar y buscar espacios de normalización pal idioma.