Los recortes del Gobiernu de Javier Fernández tán dexando en nada les poques polítiques de normalización del asturianu qu’esistíen

Iniciativa pol Asturianu refuga dafechu los planes de la conseyera d'Educación y Cultura, Ana González, que van suponer un ataque al texíu asociativu y empresarial que s'espresa en llingua asturiana. Cuéntase con desaniciar les llinies de sovenciones en concurrencia competitiva p'asociaciones, empreses y p'actividaes cinematográfiques, dalgo que se fizo d'espaldes a tol coleutivu asturfalante y ensin posibilidá nenguna de negociación.

La convocatoria taba bien lloñe de ser ideal y anque dende Iniciativa pol Asturianu s’acepta que yeren necesarios cambeos nun ye d’esta manera como han facese. Tien de tenese en cuenta a los afectaos y escuchase toles voces, non acabar coles ayudes de forma unillateral y ensin alternatives. D'esta miente va tocar la llinia de flotación de munches empreses del sector cultural n'asturianu, como les editoriales, que yá taben pasando la so propia crisis y van ver amenorgaes les sos posibilidaes de visibilización de la so producción.

Sicasí, consideramos positiva la medría del presupuestu n'otres partíes, principalmente l'apoyu a la música n'asturianu qu'ensin dulda sofitará la medría y promoción d'esta estaya de la cultura asturiana.

Per otru llau, talantamos que ye indispensable iguar la problemática del etiquetaxe n'asturianu, al qu'afecten estos recortes yá que les empreses qu'etiquetaben de forma billingüe dexen de recibir sovenciones pa sufragar el coste qu'ello suponía. Pa Iniciativa pol Asturiana ye necesaria una protección llegal, en forma de Llei d'etiquetaxe asemeyada a la que tienen otros territorios, pa que les empreses que lo deseen puedan etiquetar esclusivamente n'asturianu y asina reconocer los derechos llingüísticos de les y los falantes del nuestru idioma, asina como apoyar l’etiquetaxe billingüe y l’usu del asturianu nel sector priváu con midíes que pueden salir a costu cero y dar importantes frutos na normalización del idioma.