La organización solicita que los topónimos oficializaos apaezan por defectu nos dnis que s’emitan, acordies cola llegalidá vixente
El pasáu xueves 18 de xineru de 2016, Iniciativa pol Asturianu tuvo conocencia d’una nueva quexa, fecha na oficina de la Policía Nacional de Llangréu, na que a un vecín del conceyu se-y negaba renovar el D.N.I. col topónimu de la so localidá n'asturianu. La disculpa del funcionariáu foi tocante al sistema informáticu, que nun taba actualizáu y nun-yos daba la opción de poner el nome oficial.
El Gobiernu d'Asturies, basándose na Llei 1/98, de 23 de marzu, d'Usu y Promoción del Asturianu, aprobó’l Decretu 98/2002, de 18 de xunetu, pol que “s'establez el procedimientu de recuperación y fixación de la toponimia asturiana” pues “los topónimos d'Asturies tendrán denominación oficial na so forma tradicional, atribuyendo al Conseyu de Gobiernu del Principáu d'Asturies la competencia pa determinar los topónimos de la rexón”. D'esta miente, el 7 de xunetu de 2005, tres dar l'Ayuntamientu de Llangréu'l so preste, la Conseyería de Cultura, Comunicación y Turismu espublizó nel BOPA el decretu pol que s'aprobaron les “formes toponímiques del conceyu, considerándoles oiciales y sustituyendo les anteriormente vixentes, si les hubiere”.
Más de 10 años dempués, vemos cómo les Instituciones y Alministraciones Públiques entovía nun cumplen les lleis autonómiques en materia de derechos llingüísticos y de reconocencia y usu de la toponimia tradicional d'Asturies. Nel casu d’otres CCAA, como Galicia, Euskadi o Baleares, tamién hebo una recuperación de la so toponimia hestórica. Sicasí, les sos formes tradicionales sí que son respetaes y emplegaes pol conxuntu de les AAPP estatales, autonómiques y municipales.
D’esti mou, Iniciativa pol Asturianu denuncia l’incumplimientu sistemáticu de la toponimia oficial asturiana nes diferentes estayes de la Policía Nacional y esixe l’actualización de les bases de datos pal so emplegu, a toles instancies, de manera que les lleis autonómiques seyan respetaes y que ningún asturianu/a seya discrimináu pol usu de los topónimos tradicionales y/o por falar na llingua asturiana y el gallego-asturianu, equiparándose al restu de ciudadanos del conxuntu del estáu.
La nuesa solicitú pasa porque los nomes tradicionales y agora oficiales de los pueblos y ciudaes d’Asturies apaezan de forma automática, y nun dependan de la voluntá del funcionariu de turnu, que se-y permita al ciudadanu llevar o non el nome correctu del so llugar. Amás, solicitamos que, igual qu’ocurre n’otros territorios con llingua propia, el DNI vaya redactáu en billingüe (asturianu/castellán) una reivindicación que dellos ciudadanos ficieron yá nes comisaríes d’Asturies y que sigue ensin respuesta.
