Iniciativa pol Asturianu propón que s'emplegue l'asturianu nel Antroxu d'Uviéu

Espublizao 29/01/13

 

L'asturianu suel tar presente en dellos de los cartelos asoleyaos per estes feches p'anunciar la programación d'Antroxu nos conceyos. Sicasí, la mayoría de los mesmos preséntense en castellán o faen un usu mínimu del idioma propiu -llendáu namás al nome de la fiesta- mientres otra información como la fecha o los actos a celebrar vienen en castellán.
 
Dende Iniciativa pol Asturianu queremos valorar positivamente l'usu del términu tradicional d'Antroxu que faen dalgunos conceyos d'Asturies, como Avilés o Xixón. Sicasí, d'otra miente, suel arrenunciase a emplegar l'idioma d'una manera normal en tola información (programación, feches, regles de los concursos...) o mesmamente úsase únicamente'l castellán, escaeciendo y arrequexando'l nuesu patrimoniu llingüísticu.
 
Un exemplu d'ello ye'l conceyu d'Uviéu onde, dende 2010, volvió a recuperase'l términu Antroxu pero namái pal Festival Gastronómicu celebráu nestes feches, mientres la cartelería oficial del Ayuntamientu emplega namás “Carnaval” y “Oviedo”. Esti arrequexamientu refuérzase cola nueva imaxe corporativa de la promoción cultural de la capital representáu con una "O" (en referencia a "OviedoX4"). Esti logotipu, que nun principiu pretende crear una identidá de marca, escaez al tiempu y contradictoriamente la propia identidá del conceyu, ya que'l topónimu propiu y tradicional ye "Uviéu". L'asturianu sigue siendo víctima d'una Casa Conceyu que representa a la segunda mayor población d'Asturies y que nun fai nada por respetar la Llei d'Usu y por da-y puxu al idioma dende les instituciones. 
 
Poro, dende Iniciativa pol Asturianu, vamos esixir a los responsables d'esti conceyu qu'igüen esta llaceria y qu'adquieran el compromisu de dar pasos nuevos nel usu del idioma asturianu. Amás, pidimos a ciudadanos d'otros conceyos que se pongan en contautu con nós p'asoleyar otres situaciones paecíes y poder presentar les quexes oportunes.

Videu destacáu

Protocolu Garantía de los Drechos Llingüísticos

El Protocolu pa la Garantía de los Drechos Llingüísticos ye un documentu internacional que quier ser una continuación de la Declaración Universal de los Drechos Llingüísticos aprobada va agora venti años.