La organización participó na 29 edición del Conseyu de Drechos Humanos de la Organización de las Naciones Xuníes y güei presentó los resultaos n’Uviéu
La delegación d'Iniciativa pol Asturianu que participó’l pasáu xueves 25 de xunu na misión internacional presente nel 29 Conseyu de Drechos Humanos celebráu pol Altu Comisionado de la Organización de les Naciones Xuníes (ONX) en Xinebra, formada por Inaciu Galán y Marissa Bordallo, presentó los resultaos del viaxe esta mañana nel llar de l'Academia de la Llingua Asturiana cola presencia del Secretariu de la institución académica, Roberto González-Quevedo.
Marissa Bordallo, que tuvo na delegación d'Iniciativa pol Asturianu en Xinebra, esplicó nel actu como la presencia na sesión y l'esmolición de la ONX pola situación del asturianu como incumplimientu de los Drechos Humanos, “supón un finxu pa la llingua asturiana y pa la so reconocencia internacional”.
Inaciu Galán esplicó na rueda de prensa los detalles del trabayu realizáu por Iniciativa pol Asturianu en Xinebra, onde, de la mano de la European Language Equality Network (ELEN) formada por organizaciones en defensa de llingües en peligru de toa Europa, presentóse un informe al Altu Comisionáu de Drechos Humanos con una amuesa de los casos de discriminación por cuestiones llingüística que se dieron nos últimos años n’Asturies.
La delegación Ibérica de ELEN que tuvo presente en Xinebra reclamó'l fin de les discriminaciones escontra los falantes de les llingües distintes del castellán, que como l'asturianu viven situaciones que son consideraes pola ONX como imcumplientos de la Declaración Universal de los Drechos Humanos.
Pa Iniciativa pol Asturianu y tal como comentó Galán na rueda de prensa “la solución ta en trabayar pa reformar el Estatutu ya incluyir la oficialidá”. Sicasí, esplicó que primero “ye necesario dar solución a la discriminación de forma inmediata, poniendo en marcha les ferramientes llegales yá esistentes, casu de la Llei d'Usu del Asturianu de 1998 y la Carta Europea de Llingües Minoritaries ratificada per España en 2001”. “Dos elementos lexislativos inoraos dafechu n’Asturies”, recordó.
Iniciativa pol Asturianu axuntóse estos díes, y sigue faciéndolo entá, colos grupos parllamentarios del nuevu parlamentu asturianu, esplicando los resultaos del so viaxe a Xinebra y recordando la necesidá de que la oficialidá tea nel discutiniu políticu nesta llexislatura, buscando un consensu alredor d'un modelu concretu que tenga'l mayor sofitu posible. Amás, solicitaron a los grupos que se diseñe y apruébase un Plan de Normalización pa Asturies, primero qu'acabe l'añu, pa qu’en 2016 puedan empezar a dase meyores na normalización del asturianu y gallego-asturianu.
Videu de la intervención na ALLA
