Esti sábadu, día 7, presentóse nel Espacio Joven, en Sanander (Cantabria), l'asociación Alcuentru. Esta asociación surde coles mires de defender y promocionar el patrimoniu llingüísticu cántabru. Nel actu tuvieron dellos miembros d'Iniciativa pol Asturianu, convidaos a un alderique alredor del futuru de la variedá asturlleonesa falada en Cantabria.
Tres una curtia esplicación del proyectu de Alcuentru, una mesa redonda moderada por Daniel Lobete, d'Alcuentru), tuvo como participantes a Inaciu Galán (Iniciativa pol Asturianu), Lucía López Marco (Escuela d'Aragonés Nogará), Jesús Salas (Asociación Rede), Raul Molleda (investigador y activista) y Egatia Gómez (Asociación Puvisas).
L'alderique sirvió pa plantegar idees y preguntar a los ponentes sobre la so visión de la situación del patrimoniu llingüísticu cántabru. Ente les cuestiones que tuvieron nel alderique tuvo la propuesta d'Inaciu Galán de poner pontes ente Cantabria y les demás variedaes del dominiu llingüísticu asturlleonés, buscando modelos llingüísticos confluyentes y collaboración ente les organizaciones pa les munches cuestiones comunes que tien la comunidá de falantes.
L'eventu remató con dos actuaciones musicales nes que'l cántabru tuvo presente, colos grupos Cambalúa dúo y la panderetera Soltxu.
