El pasáu miércoles 10 de mayu, Inaciu Galán y González, presidente d’Iniciativa pol Asturianu tuvo presente na Comisión Especial d’estudiu sobre’l réxime de proteición y promoción del Asturianu que se celebró na Xunta Xeneral del Principáu d’Asturies.

La intervención del presidente d’Iniciativa pol Asturianu xiró al rodiu de la importancia de reconocer los drechos llingüísticos de los asturianos cola oficialidá del idioma dientro del Estatutu d’autonomía: “Nel marcu de la Constitución española, namás la oficialidá pue garantizar los drechos de los falantes y la presencia pública que requier una llingua minorizada pa tener una oportunidá de futuru”. Ya entrugó a la Cámara direutamente: “¿Tienen la intención de salvar esta llingua y proyectala hacia’l futuru como un elementu importante na vida de los asturianos y les asturianes, o pela cueta, van dexar que l’asturianu muerra pasu ente pasu nes próximes décades?”

Amás, intervinieron distintos representantes de la sociedá civil asturiana ente los que s’alcuentren empresarios como Adrián Morán Suárez, David Marcos Antón, Sergio Rodríguez o María Lavilla o editores como Esther Prieto Ángela Sánchez Vallina que pudieron aldericar colos representantes de los Grupos parllamentarios.