Ésitu de l'Asamblea Xeneral d’ELEN de 2013
L'Asamblea Xeneral d’ELEN foi recibida como un gran ésitu per parte de los delegaos de la ONG, axuntaos en Ti Breizh (Casa de Bretaña) en París, onde s'espunxo la estratexa de la organización pa 2014 con un enfoque basáu nos derechos llingüísticos, el sofitu internacional y el desenrollu de proyeutos conxuntos de revitalización llingüística. Iniciativa pol Asturianu unvió a Xosé B. Álvarez, vocal de Rellaciones Internacionales, pa tratar la problemática situación llegal del asturianu.
Unes 40 organizaciones llingüístiques de toa Europa participaron, amás d'otres 10, incluyendo a sardos, friulanos, meänkieli y samis, que treslladaron los sos meyores deseos, sofitu y encamientos.
Hasta la fecha ELEN representa 42 comunidaes llingüístiques en 21 Estaos.
El llabor centróse na ellaboración d'un programa de trabayu pa 2014, la creación de la nueva páxina web y l'establecimientu de sub-redes académiques y mediátiques.
Comités d'acción especiales axuntáronse pa tratar les principales árees problemátiques europees nel ámbitu de les llingües minorizaes, como’l comité pol Estáu francés (dirixíu por Tangi Louarn), pol Estáu español (dirixíu pol caderalgu Ferrán Suay), poles minoríes llingüístiques húngares y polos problemes particulares a los que s'enfrenten los idiomes Urales nel este d'Europa. Cada comité ellaboró propuestes específiques pal llabor de protección como parte del programa xeneral de trabayu d’ELEN pa 2014.
Describiendo'l trabayu mientres los últimos años na XE y el Conseyu d'Europa, el vicepresidente Davyth Hicks (Eurolang) sorrayó la importancia del ésitu del Informe del Parllamentu Européu tocante a Idiomes en Peligru (“Informe Alfonsi”), sofitáu por ELEN, y cómo la so aprobación por nidia mayoría (92%) ilustra un cambéu radical nel sofitu a les llingües minorizaes. Amás, el sofitu de diputaos de tolos partíos nuna serie d'iniciatives que fueron dende derechos llingüísticos a financiamientu de proyeutos llingüísticos na XE ye pa ELEN un bon presaxu de cara a un futuru sofitu a la organización y los so oxetivos na XE.
Amás, ELEN (representada por Eurolang na XE y el Conseyu d'Europa) siguió trabayando estrechamente col Intergrupu pa les Minoríes Tradicionales, Comunidaes Nacionales ya Idiomes del Parllamentu Européu. El llabor inclúi, por casu, la nueva resolución per parte del Intergrupu, del eurodiputáu Csaba Tabajdi, pidiendo un mecanismu de proteición na XE xurídicamente venceyante pa les minoríes nacionales y llingüístiques, asina como trabayar nuna iniciativa llexislativa pa la ratificación per parte del Estáu italianu de la ECRML (Carta Europea de les Llingües Rexonales o Minoritaries).
El vicepresidente Paul Bilbao (Kontseilua) afondó sobre'l trabayu d’ELEN nes Naciones Xuníes y destacó que la organización tien de ser la plataforma y altavoz pa tolos idiomes minorizao, y que tien de garantizar la defensa de los derechos llingüísticos como parte integrante de los derechos humanos.
Tangi Louarn y Anne Marhic (Kevre BREIZH y ELEN-Francia) presentaron les actividaes de les organizaciones na UNESCO y pa la Revisión Periódica de la ONX.
Amás, ELEN asumió una propuesta de los delegaos húngaros basada en trabayar pa establecer l'húngaru como llingua oficial "rexonal" nes árees de fala húngara de Rumania y Eslovaquia.
El caderalgu Ferrán Suay (ACPV) resumió les propuestes del Comité d'Iberia, que va buscar abordar la cada vez peor situación de toles llingües nel marcu del Estáu español, sobremanera n'Asturies y Aragón, amás de Valencia y les Islles Baleares pal marcu del catalán, de Navarra pal vascu y de Galicia.
ELEN-Francia sorrayó los graves problemes a los que s'enfrenten toles llingües "rexonales" nel Estáu francés, la necesidá de la ratificación francesa de la ECRML y la necesidá de trabayar por un marcu llegal que protexa a estos idiomes y dexar el desenvolvimientu y l'incorporación d'una estructura de revitalización.
ELEN tamién dio la bienllegada a una nueva dimensión oriental del so trabayu cola delegación d'Estonia, representada por Merit Leht-Smith (tártaru), qu'encamentó una mayor acción pa les llingües minoritaries en territorios allende la XE.
Amás, ELEN tamién dio la bienllegada a la esperta ugrofinesa Caderalga Dra. Anneli Saarhima, quien se refirió al llabor de la rede ELDIA, apocayá terminada, y al so barómetru de la vitalidá nes llingües finu-húngares y el desenvolvimientu de la rede académica d’ELEN.
Ente otres actividaes, la rede de medios de comunicación d’ELEN va siguir col so llabor empecipiáu tres la recién conferencia sobre radiodifusión en llingües minorizaes nel Parllamentu Européu, entamada pol eurodiputáu Iñaki Irazabalbeitia, con una presentación al Intergrupu con un conxuntu d'encamientos pal futuru desenvolvimientu d'esti tipu de medios.
ELEN unviará’l programa de trabayu y los encamientos a simpatizantes y partidarios nel Parllamentu Européu, la Comisión, el Conseyu d'Europa, la ONX, la UNESCO, la OSCE y los estaos y gobiernos autónomos.
En declaraciones a la prensa, el presidente reelectu d’ELEN Jean-Marie Woehrling, unu de los autores de la ECRML, dixo que se sentía "bien impresionáu pola cantidá d'enerxía, l'entusiasmu y el trabayu duru realizáu polos delegaos y pol aumentu de l'afiliación en toa Europa".
"Estos factores, combinaos cola enorme cantidá d'esperiencia na revitalización de les llingües que munchos miembros d’ELEN tienen, van suponer una gran fuercia a midida qu’entamemos a implementar el nuesu programa de trabayu y van siguir atrayendo a nuevos miembros y simpatizantes."
Dende l'aconceyamientu, tantu l'ex-diputáu Miquel Mayol, líder de l'asociación d'escueles catalanes del norte, Bressola, como Attila Beno, del Institutu Llingüísticu Szabó T. Attila y l'Asociación Transilvana pol Cultivu del Húngaru, vienen de confirmar la so afiliación. (Eurolang 2013)
