Iniciativa pol Asturianu participa un añu más nuna Manifestación pola Oficialidá con gran asistencia

Espublizao 08/05/17

Esti vienres 5 de mayu los asturianos y asturianes salieron a la cai pa reivindicar la reconocencia del estatus llegal d'oficialidá pal idioma nel Día de les Lletres Asturianes. Dende la organización Iniciativa pol Asturianu sofitose un añu más esta manifestación, participando na marcha y animando a tolos socios, simpatizantes y en xeneral, a la sociedá asturiana, a llevantar la voz pola so llingua, que carez tanta necesidá d'acción per partes de les alministraciones, asina como polos falantes, que siguen ensin ver los sos drechos civiles básicos reconocíos.

Como declarara’l presidente de la entidá, Inaciu Galán: “Un añu más la sociedá asturiana demostró qu’esta ye una reivindicación mui viva y que precisa d’una solución inmediata; nun pue dexase pasar más tiempo, porque la situación del idioma ye difícil”. Faciendo hincapié en que: “Ye importante xenerar un consensu alredor de la oficialidá. Na cai yá hai consensu, agora falta que los partidos que siguen negando la posibilidá d’oficializar l’asturianu, asuman esta reivindicación que lleva tantos años puesta enriba la mesa”.

La organización ufrió esti añu dellos materiales pa usar na rede, asina como pa imprimir y usar en cualesquier ámbitu, col lema "Oficialidá pal asturianu ye futuru". Y precisamente con esti lema vendiéronse camisetes que llevaron los sos simpatizantes y que, en vista del éxito, van seguir comercializándose.

La Manifestación pola Oficialidá qu’entamó a les 19:30 hores y salió de la Estación del Norte d'Uviéu cuntó con una gran acoyida y participación per parte de la sociedá civil a pesar de les dudoses condiciones meteorolóxiques. Depués, munchos de los manifestantes quedaron al actu del Teatru Campoamor onde se celebró la Xunta Estraordinaria de l’Academia de la Llingua

 

Galería de semeyes de la Manifestación pola Oficialidá

Videu destacáu

Protocolu Garantía de los Drechos Llingüísticos

El Protocolu pa la Garantía de los Drechos Llingüísticos ye un documentu internacional que quier ser una continuación de la Declaración Universal de los Drechos Llingüísticos aprobada va agora venti años.