El sábadu 11 de xunu Iniciativa pol Asturianu recupera la celebración del Día de les Lletres Asturianes en Madrid, en collaboración col Centru Asturianu de Madrid. Va celebrase un actu nel que se presentará la revista Formientu y se fadrá una llectura de testos lliterarios n'homenaxe a la nuesa llingua y a los escritores qu'escriben n'ella.

L'actu va celebrase nes instalaciones del Centru Asturianu de Madrid nel centru de la ciudá, na cai Farmacia, 2, esquina cola cai Fuencarral, de magar les 20 hores.

Dende Iniciativa pol Asturianu animamos a participar d'esti actu a tolos asturianos y asturianes que tán na capital, asina como a aquelles persones que quieran faer un homenaxe a les Lletres Asturianes. L'actu quier ser tamién una forma de reivindicar la visibilidá del asturianu nel ámbitu estatal, onde la falta d'oficialidá fai que la llingua asturiana nun apaeza xunto al restu de les llingües del estáu.

Agradecemos a les persones interesaes en participar de la llectura colectiva que mos unvien un corréu a info@s806295988.mialojamiento.es de cara a una meyor organización del actu.