Iniciativa pol Asturianu dio na presentación del proyectu poéticu-musical "Aire, fuego y deseo" (n'asturianu "Aire, fueu y deséu”), tornáu a toles llingües ibériques y al ladinu (sefardí), el títulu d’embaxador de la llingua asturiana al escritor Juan Carlos García Hoyuelos. L’actu foi una amesta ente un recital de los autores que fixeron les tornes al asturianu, asina como de voluntarios que quixeron compartir col públicu los poemes del llibru, el visionáu d’estremaos videoclips y un conciertu de Toli Morilla.
La entidá sofitó dende l’entamu esti proyectu qu’entiende como un acercamientu ente toles llingües ibériques y que, sobremanera, ye una bona noticia pa la fastera de fala asturllionesa, territoriu que necesita de axuntar fuercies y texer llazos p’algamar una presencia del idioma muncho meyor fuera d’Asturies.
El llibru cunta con bon númberu d’autores asturianos, lleoneses y mirandeses como Berta Piñán, Pablo Texón, José Alfredo Hernández Rodríguez, Roberto González-Quevedo o Amadeu Ferreira. Esta obra lliteraria vien acompañada d’un discu con cantares de músicos de la talla de Tarna, Toli Morilla o Manuela Elena. Amás de la nuesa collaboren con esta obra instituciones como l’Academia de la Llingua Asturiana, y les asociaciones llioneses y zamoranes Faceira y Furmientu. Y puede mercase nel serviciu d’atención al públicu de la entidá, nel Conseyu de mocedá de Xixón de 17 a 20 hores.
