El yá tradicional programa de radio Iniciativa pol Asturianu nes ondes camuda'l so formatu pa convertise nun espaciu más completu que va emitise en más d'una docena de radios d'Asturies coles que la organización tien alcuerdu pa la emisión del programa.
Iniciativa pol Asturianu nes ondes ye un programa que dende 2013 y dirixíu por Samuel Gradín vien recoyendo l'actualidá del idioma al traviés d'entrevistes colos protagonistes de les iniciatives más importantes. Amás, cunta con estayes divulgatives del propiu idioma con dellos collaboradores.
El programa emítese nes siguientes emisores per tol territoriu d'Asturies y pa la emigración asturiana en Bruseles: Radio Sele, Radio Ujo, AllerFM, Radio L.lena, Radio Kras, Radio Noreña, Radio Nava, Onda Peñes, Onda Corvera, Radio Alma (Bruseles)… y puede sentise tamién nes canales d'Iniciativa pol Asturianu n'Ivoox y YouTube.
Nel programa d'esti mes entamamos saludando al Presidente d'Iniciativa pol Asturianu, Inaciu Galán, col que fadremos un repás tolos meses de lo asocedío nel mes pasáu y les previsiones pal mes d'abril nel que tamos al respeutive'l nuesu idioma.
Vamos dir pa Corvera pa falar fonderamente col poeta Berto García.
Berto García naz en Les Vegues (Corvera), en 1975, y hasta la fecha tien seis poemarios editaos: Ensin otra sida (Trabe, 2005), Treslallende (Trabe, 2007) [escritu a medies con Carlos Suari], Manual contra’l vacíu (Trabe, 2008) [Premiu Fernán Coronas 2007], Cuando’l mundu debala (Academia de la Llingua Asturiana, 2011) [Premiu Llorienzu Novo Mier 2009], Inercia (Trabe, 2013) y Tendal (Suburbia, 2013).
Nel requexu "Deprendi l'asturianu", la nuesa mayestra Ana María Suárez aportarános una nueva pallabra, amás de deprendenos ortografía.
La nuesa siguiente convidada ye Carlota. Una profesora catalana que mos cuntará'l proyeutu de la "Primer axenda solidaria pa Profes n'apuros" qu'entamaron en Catalunya y que va tener la so versión n'asturianu gracies al sofitu d'Iniciativa pol Asturianu.
Pa rematar el programa, na nuesa seición #TVnaRadio col periodista Damián Barreiro daremos anuncia al entamu d'emisiones de la nuesa plataforma multimedia col programa tv "Alderiques d'Asturies" en MuyMuy Televisión y el cursu d'asturianu qu'empicipia pa los profesionales del mediu públicu de comunicación TPA (Televisión del Principáu d'Asturies).
