Iniciativa pol Asturianu felicita al Real Oviedo pol usu del asturianu na so páxina web

Espublizao 19/05/17

Iniciativa pol Asturianu, dende la vocalía de deportes de la organización, quier faer pública la so felicitación a la entidá azulona pol usu continuáu del idioma d’Asturies na so páxina web oficial.

Conocedores, como somos, de que’l Real Oviedo ye una de les entidaes deportives más importantes del país no que cinca a siguidores, sabemos de la importancia que tien l’usu de la llingua asturiana nos sos medios de comunicación pa difundir la nuesa cultura y visión del mundu, asina como fomentar el so usu y normalización dientro de la sociedá civil, ún de los oxetivos básicos de la nuesa entidá.

Poro, la organización quier amosar tamién el so compromisu y disponiblidá pa tolo que pueda a ayudar a siguir y ameyorar esta estaya de trabayu. Estaya de trabayu que desendolquen con normalidá dende va tiempu otres entidaes deportives d’Asturies como son l’U.C Ceares, l’Avilés Stadium, Rosal F.C o Stiaua d’Asturies. 

Convidamos asina a que la entidá deportiva de la capital del país siga calteniendo l’usu normal de la llingua asturiana ya incluso afonde nel so desendolque, sirviendo d’exemplu ya estímulu pa otres entidaes deportives d’Asturies.

Videu destacáu

Protocolu Garantía de los Drechos Llingüísticos

El Protocolu pa la Garantía de los Drechos Llingüísticos ye un documentu internacional que quier ser una continuación de la Declaración Universal de los Drechos Llingüísticos aprobada va agora venti años.