Iniciativa pol Asturianu entrega esta tarde los premios del concursu de micropoemes en Twitter que tuvo más de 200 participantes en trés díes

Espublizao 25/03/15

Una decena d’editoriales asturianes patrocinen esti concursu “Cola poesía na llingua” al que pudieron presentase micropoemes en Twitter 

Iniciativa pol Asturianu organiza esta tarde la entrega de premios de la primer edición del Concursu de micropoesía Cola poesía na llingua (#PoesíaLlingua) qu’entamó pa celebrar el Día Internacional de la Poesía y da-y mayor presencia al asturianu y a la poesía n’asturianu nes redes sociales. 

El concursu tien premios populares, votaos polos internautes al traviés del retuitéu de los micropoemes, asina como premios del xuráu, que tuvo formáu polos escritores Lluis Portal Hevia, Enrique Carballeira y el periodista Iván Llera Huerta, faciendo de secretariu Inaciu Galán, presidente d’Iniciativa pol Asturianu.

Ente los micropoemes presentaos col hagstag o etiqueta #PoesíaLlingua los votos de los internautes dieron el primer premiu popular a Iván Rendo Barreiro (@ivanrendo) con 189 retuiteos. Otros diez finalistes enllenen el llistáu de ganadores de los premios populares.

No que cinca a los premios del xuráu, el primer premiu foi p’Águeda Díaz Tuero (@Chandri_) El segundu premiu va entregase a Pablo Rodríguez Medina (@PabloRguezMedin), quedando en tercer llugar Miguel Rojo Martínez (@joegroumil) Por mor de la importante calidá de los poemes presentaos, el xuráu dio otros doce accésits.

L’actu va celebrase güei miércoles 25 de marzu a partir de les siete la tarde nel Conseyu de la Mocedá de Xixón, nel 68 de l’avenida Manuel Llaneza, coincidiendo cola entrega de diplomes de los VI Cursos d’Asturianu en Xixón y cuntando con delles actuaciones musicales y la presencia del vicepresidente de l’Academia de la Llingua Asturiana, ente otros representantes.

El concursu cunta col patrociniu d’Algamar Producciones, Asturtoons Editorial, Ediciones Trabe, La Sidra, Pintar-Pintar Ediciones,  Revista Formientu y Suburbia Ediciones, a los  qu’Iniciativa pol Asturianu quier dar el máximu agradecimientu por facer posible los premios d’esti concursu entamáu, como toles actividaes de l’asociación, ensin nengún tipu d’ayuda pública.

Videu destacáu

Protocolu Garantía de los Drechos Llingüísticos

El Protocolu pa la Garantía de los Drechos Llingüísticos ye un documentu internacional que quier ser una continuación de la Declaración Universal de los Drechos Llingüísticos aprobada va agora venti años.