Iniciativa pol Asturianu saca alantre esti cursu teóricu-prácticu de cómic de 35 hores, nel que va desendolcase una repasada polos distintos estilos y formatos presentes nel cómic, dende les primeres manifestaciones hasta los enclinos más actuales. Dirá realizándose amás, un blogue de siguimientu del mesmu, nel que puedan dir xubiéndose a la rede los trabayos remataos o queden éstos llistos pa una futura publicación impresa.
Esto ye, van conocese tolos pasos a dar dende la mesa de dibuxu hasta la so publicación. Asina mesmu, van dase a conocer los premios y concursos de cómic esistentes, animando al alumnáu a participar nellos, con especial atención al "Premiu Alfonso Iglesias de Cómic en Llingua Asturiana", que convoca tolos años la Conseyería d'Educación, Cultura y Deportes.
El trabayu va siguir siempres les mesmes pautes en cada unidá didáctica:
-Visionáu y analís de trabayos, con especial atención a los autores asturianos.
-Propuesta de práctica en común.
-Desarrollu del guión.
-Dibuxu de la historieta.
Un mayestru de luxu
Rumaldo Antón Barbero de Diego, más conocíu como Ruma Barbero ye un dibuxante asturianu de cómic y músicu llincenciáu en Belles Artes pola Universidá de Salamanca. Conocíu amás de por ser ún de los fundadores del grupu Felpeyu, por confundar la editorial "Cactus Comics",publicó dalgunos de los títulos más destacaos del cómic asturianu nesa dómina “Little Memo”, “Los Aguarones”, “Anselmo Ensombras” y “Love Gun”.
Igualmente collaboró cola revista El Llapiceru y nel periódicu Les Noticies con una tira cómica titulada Marcianaes. Ente les collaboraciones de Ruma colos medios de comunicación, más allá de lo especialmente rellacionao col cómic, destaquen les sos collaboraciones col diariu xixonés El Comercio; el diariu independiente, yá desapaecíu, Güei, la revista Interferencies, l'Anuariu de la Música Asturiana, publicación na que realiza la primer fotonovela n'asturianu conocida.
Na so faceta como diseñador gráficu, destaquen les carátules de los discos de Felpeyu, La Bandina, DRD, Verdasca, Blima, Tuenda, Duerna, "Música Tradicional d'Allande", "Música Tradicional en conceyu L.lena" o "Música Tradicional en concechu Quirós". Asina mesmo ye autor de bien de cartelos teatrales pa la compañía Nun Tris, o de conciertos y festivales de música.
Nel añu 2009 gana'l premiu "Alfonso Iglesias" de cómic porManzajú, una novela gráfica autobiográfica, premiu que repite nel añu 2015 gracies a El viaxe a la lluz, la so primer obre en color. A mediu camín ente'l cómic y el diseñu gráficu ta'l Cómic-CD de Los Ciquitrinos “Faciendo l'indio” del que tamién ye autor. Dende 2011 publica'l fanzine/dixital "Aguantando Cachones", con obra inédita y recopilación de trabayos anteriores.Foi miembru "fundidor" de la revista-web satírica "Fundición Príncipe de Astucias".
N'avientu de 2012 edita "La Chelita. El Salvador 1992". Una novela gráfica a partir de les vivencies y testimonios de cooperantes internacionales y veteranos de la guerrilla salvadoreña. Con esti trabayu Ruma Barbero algamaría'l Premiu al Meyor Llibru n'Asturianu de 2012 que concede la Tertulia Malory. Un añu más sero, asoleya "Aguantando cachones" (Tierra Llibros).
Pueden apuntase rellenando esti formulariu.
