La organización solicita que los topónimos oficializaos apaezan nos nuevos cartelos de la operadora ferroviaria n’Asturies
La principal operadora ferroviaria d’España, RENFE/FEVE, ta instalando nuevos cartelos nes estaciones d’Asturies. Nesti cambéu les llingues utilizaes fueron el castellán y el inglés, escaciendo dafechamente la llingua propia de la nuesa comunidá.
Por ello, Iniciativa pol Asturianu quier amosar el so descontentu con esta situación de marxinación pal col nuesu idioma. Puesto que, la rede de ferrocarriles, non solo nun lo utiliza nes informaciones, sinon qu’incumple la normativa vixente no tocante a la toponimia de les propies estaciones.
Cabe traer a l’arcoldanza, la Llei 1/98 del 23 de marzu, d’Usu y Promoción del Asturianu, concretamente el capítulu V de la mesma, onde se diz lliteralmente que: “Los topónimos de la Comunidá Autónoma del Principáu d'Asturies han tener el nome oficial na so forma tradicional”. Polo qu’aprovechamos pa reclamar que’l gobiernu asturianu informe y faiga cumplir la llei a les alministraciones comunitaries.
Poro, podemos concluyir que los topónimos de la nuesa comunidá gocien d’un marcu d’oficialidá, lo que fai que la sociedá civil asturiana tea en condiciones d’esixir que se cumpla la llei o, lo que ye lo mesmo, los drechos de los asturianos. Nesti sen, Iniciativa Pol Asturianu va tar ehí denunciando esta situación, al empar qu’ufiertando la nuesa collaboración pa guiar a la compañía.
