Iniciativa pol Asturianu conderga l'anulación del Gobiernu d'España al Plan de Normalización de Carreño y recuerda que nun tien base xurídica

Espublizao 29/03/16

La Delegación del Gobiernu d'España n'Asturies vien d'anular el Plan de Normalización Llingüística de Carreño al traviés d'una orde al Conceyu na que-y reclama qu'eche atrás esti testu y los sos efectos nel plazu d'un mes. 

 

Informaos d'esta situación per parte de l'alcaldesa de Carreño, Amelia Fernández López, nun podemos más que condergar esti ataque a l'autonomía de los conceyos pa establecer midíes de normalización del asturianu, tal y como afita la Llei d'Usu del asturianu de 1998 que nel puntu 1 del Artículu 8 diz que "los ayuntamientos asturianos podrán adoptar les midíes necesaries p'asegurar la efectividá del exerciciu de los derechos llingüísticos qu'esta Llei otorga a los ciudadanos residentes n'Asturies", lo que dexa a les clares la posibilidá de poner en marcha midíes, esactamente lo que se fai al traviés d'un plan de normalización como'l qu'agora quieren prohibir dende la Delegación dirixida por Gabino de Lorenzo.

 

Esti nuevu ataque políticu contra l'asturianu del Partíu Popular ye especialmente llamentable, pues usa ferramientes del Estáu y oculta cola apariencia d'una decisión xurídica lo que nun ye más qu'un nuevu intentu de da-y un golpe más al asturianu. 

 

Al señor De Lorendo esixímos-y que retire esta orde, yá que los plane de normalización lleven décades funcionando ensin nengún tipu de problema xurídicu en munchos conceyos asturianos y la so reclamación nun tien base xurídica, pues la Llei d'Usu del asturianu permite a los Conceyos esti tipu de midíes. 

 

Al equipu de gobiernu de Carreño solicitámos-y que se niegue a acatar esta sentencia y que sigan la llucha nos tribunales hasta acabar toles posibilidaes. El Gobiernu d'Asturies habría da-y sofitu inmediatu a Carreño nesta situación y mediar col Gobiernu d'España pa que retiren esti ataque inxustificáu.

Videu destacáu

Protocolu Garantía de los Drechos Llingüísticos

El Protocolu pa la Garantía de los Drechos Llingüísticos ye un documentu internacional que quier ser una continuación de la Declaración Universal de los Drechos Llingüísticos aprobada va agora venti años.