Iniciativa pol Asturianu va celebrar esti sábadu 30 de mayu, en Xixón, el so segundu Congresu, que como marquen los estatutos de la organización ha celebrase cada trés años y ha sirvir pa marcar les llinies de trabayu de los trés años siguientes, asina como anovar la Xunta Direutiva cola votación de la Xunta Xeneral d'asociaos y asociaes.
 
El Congresu celebraráse nel chigre-llibrería La Revoltosa (cai Juan Alonso, 12, barriu L'Arena, Xixón) A partir de les 17 hores entamará la identificación de los socios. Darréu fadráse analís de les cuentes y l'actividá de la organización nos trés años caberos, faciendo un balance de la xestión. Darréu fadráse la configuración definitiva de la nueva Xunta Direutiva y someteráse a votación.
 
Aprovechando esti actu Iniciativa pol Asturianu fadrá la entrega de los nuevos carnés de sociu, que van sirvir pa identificavos y que van tener tamién ventayes gracies a los alcuerdos con empreses que se tán roblando nestos meses. Dempués del Congresu, nel mesmu chigre, y a partir de les ocho la tarde, celebraráse un pinchéu amenizáu con música y monólogos.
 
Dende l'actual direutiva d'Iniciativa pol Asturianu animamos a tolos socios y socies a participar y asumir responsabilidaes na organización, pa lo que ta abierta la participación na llista de vocalíes y demás cargos orgánicos de la entidá. 
 
(Semeya: Imaxe del primer Congresu de la organización)