Izquierda Xunida yá confirmó que va presentar la propuesta nel plenu
Iniciativa pol Asturianu ta poniendo en marcha dende va unes selmanes, contautos y conversaciones con tolos grupos políticos presentes nel Conceyu d'Uviéu. L'oxetivu ye apurrir a los grupos la so propuesta pa volver a poner en marcha'l procesu de recuperación y oficialización de los nomes tradicionales del conceyu onde s'asitia la capital d'Asturies, que lleva paráu dende va años. Dende Iniciativa pol Asturianu buscamos poner fin a esta situación de paralís, agora que nel plenu vemos un consensu positivu a favor del asturianu, como pudimos ver na votación de la nuesa propuesta pa facer visibile l'usu de la llingua asturiana nos autobuses d'Uviéu, aprobada va pocos díes o'l cambiu nel reglamentu del rexistru qu'impulsamos, pa que dexara d'haber problemes pa presentar documentos n'asturianu nel rexistru.
Uviéu ye l'últimu de los grandes conceyos asturianos que falta por completar el procesu d'oficialización de la toponimia, que yá aprobaron 51 de los 78 dende 2004, cuando se punxo en marcha esta iniciativa, que surde de la petición de los ayuntamientos y d'una investigación fonda de la Xunta de Toponimia. Los conceyos con más población, como Xixón, Avilés, Mieres, Siero, Llangréu, Castrillón, Llanes, Villaviciosa, Grau, L.lena, Valdés, Cangas del Narcea y asina hasta 51 más, yá tienen aprobaos los sos topónimos tradicionales como oficiales. Amás, otros 12, incluyendo Uviéu, tán yá col procesu en marcha.
Paezmos que ye'l momentu de da-y puxu a esti procesu y pa ello animamos a les fuercies polítiques del conceyu, PP, PSOE, Foru ya IX, a que pongan en marcha'l procesu y trabayen pa da-y axilidá, pues nun pue ser que precisamente la capital d'Asturies seya unu de los últimos conceyos en reponer los topónimos tradicionales, la forma na que la xente llama a los llugares onde vive, y que con esti procesu, nun fai más que volver a la documentación oficial, pa siguir nel futuru na voz de los ciudadanos.
Representanes d'Iniciativa pol Asturianu celebraron un conceyu con Izquierda Xunida d'Uviéu onde'l grupu municipal de la formación confirmó yá que va presentar una moción. Agora esperamos que'l restu de les fuercies polítiques se sumen, como yá pasó nel restu de los conceyos d'Asturies, onde esti procesu cuntó siempres con apoyos mui amplios, y na mayor parte los casos, cola unanimidá de los plenos correspondientes.
