La organización pon en marcha una campaña dirixida a la normalización llingüística del idioma asturianu nel ámbitu socioeconómicu.

La finalidá d'esti proyeutu ye dotar a la llingua asturiana d'un estatus, amás d'un usu útil y activu na sociedá asturiana, capaz de xenerar beneficiu un económicu y social al traviés de la firma de convenios con empreses y negocios que busquen introducir l'asturianu con unos criterios básicos d'usu.

Siendo los oxetivos de toles empreses la rentabilidá económica y la satisfaición del cliente, Iniciativa pol Asturianu quier d'esta manera sensibilizar a empresarios y a consumidores en que'l so usu normal ye rentable dafechu económicamente. L'asturianu ye un elementu que condiciona la calidá del productu material y/o serviciu que s'ofrez porque crea un valor que tresciende, al tiempu que complementa, al beneficiu monetariu. D'esta miente, tener unes bones práutiques llingüístiques posibilita rentabilizar el factor diferenciador na empresa asturiana, porque aquello que se consume con estes pautes arriquez l'entornu sociocultural -y por supuestu económicu- d'onde surde la empresa o negociu.

Too ello merez asociar una imaxe y unes espeutatives a esi productu inmaterial y material pente medies de l'afitamientu d'una marca de calidá na mentalidá del mercáu. Asoléyase asina "La empresa asturiana muévese", una marca qu'aspira axuntar a toles empreses comprometíes cola sociedá y, poro, col asturianu.

Y por si fuere poco, axúntase con esta campaña un "Códigu de bones práutiques llingüístiques", un documentu que busca asesorar a les entidaes interesaes nel diseñu y aplicación d'esti tipu de polítiques na empresa o negociu. Un documentu informativu con tolos datos y pautes pa resolver les duldes más comunes.

Asina, l'actu de presentación d'esta campaña tendrá llugar el próximu 14 de xunu a les 12:30h na Sala Polivalente de la sede de la FADE (C/Pintor Luis Fernández, 2. Uviéu). La entrada sedrá llibre y cuntará cola participación de dellos empresarios y productores que yá usen l'asturianu na so actividá.