Los representantes d’Iniciativa pol Asturianu recalcaron la importancia de que les Mocedaes de la FSA-PSOE presionen pa que’l programa autonómicu de la so formación incluya la oficialidá
El pasáu 19 de febreru representantes de les Mocedaes Socialistes d’Asturies/Juventudes Socialistas de Asturias, entidá venceyada a la FSA-PSOE convocaron a Iniciativa pol Asturianu a un conceyu que se celebró nel llar de les MSA/JSA en Xixón. La organización moza taba interesada en conocer les nueses propuestes al respective de la política llingüística, de cara a proponer delles a la so formación pa incluyiles nel programa electoral de les vinientes elecciones autonómiques.
Iniciativa pol Asturianu felicitó a les MSA pola so defensa de la oficialidá dientro de la so organización y animólos a formar a la so militancia en cuestiones llingüístiques y sociollingüístiques, amás de caltener de forma interna una coherencia, usando l’asturianu nes sos actividaes, pa lo que s’alcordó entamar charres y dalgún cursín ente les dos entidaes.
Iniciativa pol Asturianu recordó la importancia de que trabayen hasta l’últimu momentu pa que la so formación, la Federación Socialista Asturiana recueya nel so programa un compromisu claru pa solucionar el conflictu llingüísticu esistente n’Asturies, pente medies de la oficialidá de la llingua asturiana, única solución posible nel marcu llegal actual.
Sicasí, esti compromisu nun ye suficiente, polo qu’Iniciativa pol Asturianu propunxo tamién otres midíes empobinaes que pueden ponese en marcha yá nel marcu actual, tales como acoyese a un Compromisu de Billingüismu 100% que yá venimos proponiendo a otres formaciones ya instituciones. Esti compromisu supondría que tolos materiales asoleyaos poles intituciones comprometíes col asturianu fueren editaes en billingüe (asturianu/castellán) dientro del mesmu formatu, dando una importante visibilidá al idioma a costu cero.
A lo llargo del conceyu falóse tamién de la necesidá de tratar la cuestión llingüística n’Asturies cola emerxencia que requier una llingua en grave peligru de desapaición, talo y como reconoz la UNESCO.
Falóse tamién de la importancia de meyorar la presencia del asturianu nos medios de comunicación, n’especial los públicos, asina como la necesaria formación del funcionariáu y la presencia digna del asturianu nel sistema educativu, que pa Iniciativa pol Asturianu pasa por convertir a l’asignatura de Llingua Asturiana nuna asignatura normal, dientro del currículu, como les demás y en tolos niveles, garantizando la llibertá de los ciudadanos al salir del sistema educativu formaos pa poder usar l’asturianu con normalidá. Amás, por supuestu, de la puesta en marcha d’esperiencies pilotu que lleven a la esistencia de modelos educativos col asturianu como llingua vehicular.
