Galán y Suárez: “Hai munches coses que se pueden facer pol asturianu que nun precisen d’inversión”

Entrevista fecha n'Asturies.com | Espublizao 30/12/11

Pablo R. Guardado.

 

Iniciativa pol Asturianu ye una asociación de creación nueva que vien a sumar na reivindicación ciudadana pa garantizar la sobrevivencia del idioma. Inaciu Galán (Xixón, 1986) y Vítor Suárez (Uviéu, 1988) son miembros de la xunta promotora.

¿Qué tal recibimientu tuvo Iniciativa pol Asturianu?
 
Inaciu: La verdá ye que tamos mui contentos. L’actu del sábadu pasáu n’Uviéu nun foi más que l’entamu d’un llargu camín, pero supunxo una bona tarxeta de presentación y cuntamos col sofitu de muncha xente. Sicasí, sabemos qu’hai munches persones desencantaes cola reivindicación llingüística pola falta de resultaos y que tovía va costar sacalos de casa. 
 
Vítor: Per otru llau tamién hai una gran parte de la sociedá asturiana que nunca nun s’implicó na reivindicación del idioma. Ún de los oxetivos d'esta organización ye llegar a eses persones y convenceles de que tomen la iniciativa pol asturianu. Necesítense munches manes pa salvar l'idioma y nun sobra naide.

¿Tán sumando muncha xente al proyeutu?
 
I: La verdá ye qu'hai gotéu continuu de xente, de tolos ámbitos, que mos pide información y s’asocia a Iniciativa pol Asturianu. Pero tampoco vamos quedar esperando a que la xente se sume. Vamos ser nós los que salgamos a la cai a buscalos, a implicar a la xente. Una organización con más pesu na sociedá permitiríanos cuntar con más fuercia frente a les entidaes públiques y privaes a les que vamos reclamar qu’usen l’asturianu.
 
V: Tamos mui contentos col recibimientu que tuvo l'asociación y esperamos que nes selmanes próximes, en viendo les nuestres actividaes, podamos dir aumentando la nuestra presencia nos conceyos del país. 
 
¿Cómo surdió esta iniciativa?
 
I:  Esti branu espublizaba un artículu nel qu’esponía la situación que yo vía nel tema de reivindicación llingüística, nel que falaba de la necesidá de ponenos en marcha pa camudar esto. Fueron munches les persones que se punxeron en contauto conmigo, y Vítor y yo punxímonos a trabayar pa presentar un proyectu d’organización seriu y planificáu.
 
V: Depués, n’ochobre, ficimos un conceyu fundacional, con xente de toa triba que s’interesare pola cuestión, nel qu'afitamos les bases pa entamar el trabayu y llegar hasta la presentación pública d'esti mes tres varies selmanes de trabayu silenciosu dende la xunta promotora de la organización.
 
¿Qué diferencies hai ente’l vuesu coleutivu y otros asemeyaos, como la Xunta pola Defensa de la Llingua Asturiana o N’Ast?
 
V: Albidramos que’l movimientu de reivindicación llingüística ye policéntricu y qu’hai espaciu pa toos, más que nada porque hai muncho por facer… Nós queremos implicar a tola sociedá y non sólo a lo que tradicionalmente se vien conociendo como asturianismu. Vamos tar muncho na cai y queremos facer ver a la xente que, amás de la importante responsabilidá de los poderes públicos na recuperación y el futuru del idioma, somos nós, toos y caún de los asturianos, quien tenemos que tomar la iniciativa, poner caún el so granín d’arena, porque tamos nun momentu nel que se va decidir si l’asturianu tien futuru o non.
 
I: Pa nós la oficialidá del asturianu ye un derechu civil irrenunciable, pero creemos que pel camín hai munches coses por facer. Nun podemos planteganoslo como un oxetivu final, sinón como un pasu más, perimportante, pero con munchu camín per delantre.
 
Enantes de davos a conocer de manera pública tuvistis aconceyamientos con delles instituciones y asociaciones. 
 
I: Nun primer momentu quiximos presentanos énte les organizaciones de reivindación llingüística que yá taben funcionando como amuesa de respetu pol so trabayu, que supunxo munchos llogros, y como una forma d’abrir pontes de comunicación y futura collaboración. Lo mesmo la Xunta pola Defensa de la Llingua Asturiana que N’Ast o la Fundación Caveda y Nava, recibieron a la organización con mui bona disposición al diálogu. Nestos momentos siguimos teniendo dalgunos conceyos con otres organizaciones sectoriales venceyaes al trabayu pol asturianu.
 
V: Tamién vimos importante presentanos ente l’Academia de la Llingua Asturiana pol so papel como institución pública y máxima autoridá llingüística d’Asturies. L'Academia tien nos sos estatutos el "velar polos drechos llingüísticos de los asturianos" y, poro, ye un elementu importante a tener en cuenta.
 
¿Hubo dalgún contautu col Gobiernu del país?
 
V: Entá non. A entamos del añu viniente fadremos una rolda de contactos más centrada yá nel ámbitu políticu.
 
¿Cuáles son los problemes más acusaos que tien la llingua asturiana anguaño?
 
I: El principal ye que, a día de güei, nun tien el so futuru garantizáu. La perda de falantes ye cada vegada más rápida y la falta d’una reconocencia de los drechos llingüísticos supón una torga perimportante; pero, sobre manera, la falta d’una voluntá política real de facer normal l’usu del asturianu. Pero eso nun significa que nun podamos siguir reclamando que se dean otros pasos, tolo que seya dir p'alantre, ameyorar la presencia pública del idioma, va facer que l'asturianu vaiga amenorgando les posibilidaes de desapaecer.
 
¿Cuál ye la vuesa opinión del recorte anunciáu en Política Llingüística pal 2012?
 
I: Cualesquier recorte a les polítiques a favor del asturianu ye negativu, pero nós queremos facer entender a los poderes públicos qu’hai munches coses que se pueden facer pal asturianu y que nun precisen nenguna inversión; namás voluntá. Nesi sen trabayamos na redacción d’un informe que puede ser mui útil a les instituciones, sobre manera agora, en tiempos de crisis, con munches idees pa normalizar l’asturianu a costu cero.

¿Tienen confianza nel llabor del Gobiernu nuevu d'Asturies no que se refier a la normalización del asturianu?
 
V: Nós nin confiamos nin dexamos de confiar; sedrán los fechos los que determinen la valoración d’esi llabor. Lo primero que vamos facer ye esplica-yos que la política llingüística nun puede ser un espaciu acutáu namás a la Conseyería de Cultura. En tolos ámbitos de xestión pública, dende toles conseyeríes, ha tenese en cuenta la normalización del idioma.
 
¿Qué oxetivos se marca Iniciativa pol Asturianu a plazu curtiu?
 
I: Dir dando pasinos que visibilicen l’asturianu, implicando tamién al sector priváu nel procesu de recuperación y, sobre manera, mentalizar a la xente de la necesidá d’implicase dende’l so llugar; face-yos ver que siendo ama de casa, mecánicu o abogada, tamién se pueden facer coses pol asturianu.
 
V: Estos díes daremos anuncia del primer resultáu del nuesu trabayu: un avance nel campu de los medios de tresporte, qu'esperemos que seya namás l'entamu de la introducción del asturianu nesti campu, que tovía ta mui poco visible. 
 
¿Tienen en mente dalguna campaña?
 
I: Tenemos una fueya de ruta con campañes pa los años próximos y va dir ampliándose con más coses según cuntemos con más persones y más recursos pa llevales alantre. Enantes de que termine l’añu, vamos entamar coles primeres cuestiones, y como comentó Vítor, podremos falar de los primeros resultaos visibles.
 
¿Cómo van organizar el coleutivu?
 
I: Queremos ser una asociación flexible, nel que seya fácil afayase y, sobre manera, trabayar. Vamos funcionar con grupos de trabayu que van responsabilizase directamente de campañes determinaes col envís de poder simultaniar delles al mesmu tiempu y que la xente s’implique y garre responsabilidaes.

¿Cuál ye’l perfil de les socios?
 
I: Pues nun primer momentu la media d’edá yera baxa, pero cada vegada va sumándose más xente de más edá. La mocedá ye imprescindible pa dar puxu al proyectu, pero tamién nun mos vendrá nada mal cuntar cola esperiencia de la xente con más años de trabayu al llombu.

Agora tán en plenu procesu de composición de la direutiva. ¿Qué persones opten a la presidencia?
 
V: A principios d’añu abriráse’l plazu pa presentar candidatures y en febreru celebraremos un congresu nel que los socios decidirán quién va dirixir esti colectivu, porque pel momentu funcionamos como xunta promotora. Tolos socios pueden optar a la presidencia y esperamos qu’heba un procesu participativu qu’arriqueza a la organización.
 
La xente que quiera collaborar con Iniciativa pol Asturianu, ¿qué ha de facer?
 
V- Puede ponese en contauto al traviés de la páxina web de la organización, onde hai un formulariu de contautu o simplemente escribinos a contautu@iniciativapolasturianu.org. Dientro poco vamos tener un formulariu web p’apuntase de forma más cenciella. Hai dos formes de facelo: como asociáu miembru, por 6 euros al mes (o 60 nun pagu añal reducíu d’una vez), o 20 euros al añu pa los asociaos simpatizantes.

Videu destacáu

Protocolu Garantía de los Drechos Llingüísticos

El Protocolu pa la Garantía de los Drechos Llingüísticos ye un documentu internacional que quier ser una continuación de la Declaración Universal de los Drechos Llingüísticos aprobada va agora venti años.