L’alumnáu ta abandonando Llingua Asturiana porque Educación nun pon el profesoráu suficiente

Delles families con fíos matriculaos nel colexu públicu Clarín de Xixón denuncien que los sos fíos nun tienen accesu a l'asignatura de Llingua Asturiana nes condiciones de dignidá y calidá mínimamente esixibles. El centru nun cuenta col profesoráu suficiente pa poner clases d'asturianu por mor de la gran demanda, y la respuesta de la Inspección educativa de la Conseyería d'Educación nun foi otra que dar por bono que los escolinos d'esti colexu se xunten en grupos de cursos distintos, (terceru y cuartu de primaria y quintu y sestu) xenerando grupos d'hasta 29 alumnos, cuando la ratio máxima ye de 25, onde conviven escolinos que tienen de trabayar con dos llibros distintos y materia diferente acordies col so nivel educativu. Y too esto, en namás dos sesiones de 45 minutos a la selmana.

 

Dende Iniciativa pol Asturianu apoyamos a estes families y presentamos yá una quexa a la Conseyería d'Educación y Cultura polo que consideramos un nuevu casu de marxinación y maltratu a l'asignatura de Llingua Asturiana. Esiximos a la Conseyería d'Educación qu'aumenten el númberu d'hores del profesoráu de Llingua Asturiana del centru, acordies coles necesidaes de matriculación.  

 

Solicitamos tamién al centru la so collaboración, pidiéndo-y que reclame tamién a la Conseyería una solución pa esti tratu llamentable del alumnáu que decide escoyer asturianu de forma voluntaria y tien qu'atopase con esta situación que da vergoña y que supón una marxinación de los neños y neñes, n'aules masificaes y onde s'axunten cursos distintos, lo que pedagóxicamente ye inalmisible y xenera descontentu nes families y nel alumnáu. Ye talu esti descontentu qu'en dalgunos casos hai alumnos que dexaron l'asignatura yá, al menos temporalmente, hasta que s'atope una solución a esta llamentable falta d'atención per parte de la Conseyería d'Educación.

 

Pa Iniciativa pol Asturianu, fechos como esti, y otros denunciaos en tolos niveles educativos por esta y otres entidaes a lo llargo de lo que va de cursu, faen pensar que na Conseyería d'Educación trabayen en contra de la presencia del asturianu nos centros en llugar de cumplir cola so obligación llegar d'ufiertar l'asignatura de Llingua Asturiana n'igualdá de condiciones coles demás y nes condiciones afayadices pal deprendimientu del asturianu per parte de los escolinos, garantizando siempres, como marca la llexislación, que nengún alumnu quede ensin clas d'asturianu en nengún nivel del sistema educativu.