Espertos falarán nel Seminariu “Oficialidá, el camín constitucional de futuru pal asturianu” na Universidá d’Uviéu

Espublizao 15/02/18

Los díes 2 y 3 de marzu la Universidá d'Uvieu va acoyer a espertos amosando les razones, consecuencies y ventayes d’esti cambiu estatutariu dende distintes perspectives profesionales y académiques

La ONG Iniciativa pol Asturianu entama’l seminariu “Oficialidá, el camín constitucional de futuru pal asturianu” nun espaciu d'especial simboloxía, la edificiu hestóricu de la Unviersidá d’Uviéu. Nestes dos xornaes de Seminariu la entidá quier amosar a la sociedá asturiana les motivaciones, consecuencies y beneficios que va traer la inclusión del estatuts d'oficialidá nel estatutu d’autonomía.

 

Ente toles ponencies ya intervenciones, puestes por espertos de prestixu internacioanl reconocíu, y bien conocederes de la realidá asturiana y española, les del escritor Xuan Bello, la investigadora Isabel Hevia o’l xurista y lletráu del Tribunal Constitucional José Manuel Pérez Fernández. Inaciu Galán, presidente d'Iniciativa pol Asturiana esplica "Cuntamos con una riestra de profesionales de luxu, queremos ufrir a la sociedá tola información sobre lo muncho positivo que tien la oficialidá en tolos ámbitos: sistema educativu, creación de riqueza y empléu, drechos y llibertaes, etc." 


El programa completu va dase a conocer la selmana que vien nuna rueda de prensa, pero dende la organización yá anuncien que va ser un seminariu que "va sirvir pa valtar munchos prexuicios y poner en circulación muncha información positiva que nun se te dando a los asturianos". Galán recuerda que "pidir la oficialidá nun ye más que pidir que se cumpla la Constitución n'Asturies, hai un consensu social y políticu y ye'l momentu d'avanzar nesa dirección, buscando un modelu propiu p'Asturies. Con esti seminariu queremos aportar nesi llabor".  


Cabe destacar que los actos va inauguralos el rector de la Universidá d’Uviéu, Santiago García Granda, que yá amosó nos meses pasaos l'apoyu de la Universidá a la oficialidá. 

 

Les xornaes que van ser el 2 y 3 de marzu van ser abiertes al públicu anque se recomienda inscribise. Quien quiera cuntar con un diploma de reconocmientu habrá facer un pagu de diez euros nel momentu de facer la inscripción, na páxina web d'Iniciativa pol Asturianu. Amás, como pieslle del seminariu, el sábadu 3 dende les 14:30 hores va haber una espicha na sidrería La Pumarada d’Uviéu (C/ Gascona, 8), la que puede pueden apuntase los asistentes por 25 euros.

 

El seminariu va tener llugar nel Aula Magna deñ Edificiu Hestóricu de la Universidá d’Uviéu, el viernes 2 y sábadu 3 de marzu y puede apuntase quien lo desee, calcando ya inscribiéndose nel siguiente enllaz: https://goo.gl/forms/1douboXBvbQNhAUE2

Videu destacáu

Protocolu Garantía de los Drechos Llingüísticos

El Protocolu pa la Garantía de los Drechos Llingüísticos ye un documentu internacional que quier ser una continuación de la Declaración Universal de los Drechos Llingüísticos aprobada va agora venti años.