La revista "Les Fueyes de La Semiente", d'esti centru social de L'Entregu asoleyó va delles selmanes una entrevista col presidente d'Iniciativa pol Asturianu. Reproducimos la entrevista completa.
 
 ¿Podries desplicanos como surde la idega d’entamar col proyeutu d’Iniciativa pol Asturianu?
 
-Pel branu asoleyé un artículu nel que falaba un poco de la mio esmolición por ver al movimientu de reivindicación llingüística mui paráu y fueron munches les persones que se punxeron en contauto conmigo. Xunto a Vítor Suárez  propunxímonos ponenos a la xera d’arrancar con esti proyeutu y entamamos a falar con xente qu’entendía que yera necesario cambiar lasituación, tomar la iniciativa, movilizar a la sociedá.
 
¿Qué va aportar nuevo esti proyeutu en rellación a les otres organizacionesen defensa de la llingua?
 
-Nós venimos cola idea de buscar soluciones a cuestiones concretes. Lareivindicación de la oficialidá ye daqué irrenunciable, pero entrín laconsiguimos y non, nun podemos usala como xida pa nun facer nada, hai que siguir trabayando pa cosiguir avances en munchos campos. Amás, queremos implicar a la xente de la cai, a la xente que nun sabe asturianu, a tola sociedá, porque entendemos que necesitamos muncha fuercia pa poder consiguir un oxetivu tan ambiciosu como ye salvar al nuesu idioma. Esperamos aportar tamién nueves formes de facer les coses, nun tar tanto ala defensiva, sinón lliderar soluciones y l’apertura de espacios nuevos de normalidá pal asturianu.
 
¿Tenéis pensao el trabayu en comuña col restu  d’organizaciones pol asturianu?
 
-Lo primero que ficimos dempués de crear la organización, y enantes de laso presentación pública, foi aconceyar con miembros de toles organizaciones que tán yá trabayando: Xunta pola Defensa de la Llingua Asturiana, N’ast, Fundación Caveda y Nava, etc. y nel planu institucional cola Academia de laLlingua Asturiana, yá que venimos a construyir y a xenerar espacios de convivencia, non de conflictu. Lo cierto ye que l’acoyida foi mui positiva per toles partes y nel futuru toi seguru qu’habrá collaboraciones. Cola Xunta yá nos comprometimos a participar na manifestación pola oficialidá qu’organicen cada añu nel Día de les Lletres Asturianes.
 
¿Tais teniendo dalguna toma de contautu coles instituciones gubernamentales del país?
 
-Pel momentu l’únicu contautu nesi sen foi cola Academia de la Llingua Asturiana, que mos recibió de forma mui positiva. En pasando’l congresu que tenemos a finales de febreru, entamaremos una rolda de contautos, anque laconvocatoria d’elecciones fai que les coses seyan menos estables na alministración nestos momentos.
 
¿Cuál ye la opinión que tien Iniciativa pol Asturianu frente a los últimos ataques en materia de Política llingüistica?
 
-Dafechu negativa. Los retayos sobre los yá probes presupuestos de Política Llingüística n’Asturies son pasos atrás na normalización. Sicasí, hai milenta midíes posibles pa la normalización del idioma a costu cero, namás con voluntá política, dalgo que nun va venir solo, tendremos que forzar esa voluntá política.
 
¿Cuál ye’l principal cáncanu que fai que la nuesa llingua nun espoxige?
 
-Pémeque nun se pue falar d’un cáncanu únicu, o d’una causa namás, sedría simplificar abondo. Ye más bien la combinación de dellos factores. Na sociedá hai una visión positiva del idioma, naide quier que muerra, pero dende’l movimientu de reivindicación llingüística entá nun fuimos a llegar a laxente y esplica-yos que nun basta con querer, qu’hai qu’actuar, tomar lainiciativa. La mayor parte la xente velo como dalgo ayeno a ellos, no que nun pueden facer nada, pero tol mundu puede facer coses nel so ámbitu. Llevamos demasiaos años faciendo’l diagnósticu, agora hai qu’actuar p’atopar la cura.
 
Tresel pieslle del periodicu Les Noticies ¿Creéis que tán capacitaos los diarios dixitales alternativos pa cubrir l’espaciu que dexa esti tradicional periódicu asturianu?
 
 
-El pieslle de la edición en papel d’esti periódicu ye una mala noticia pal asturianu, anque los periódicos, toos, acabarán abandonando la publicaciónen papel, o dende llueu, cada vegada sedrá más minoritaria. Lo que pasa qu’una llingua feble, nuna mala situación, como asocede cola de nueso, pues carez primero estos problemes. Sicasí, tendría que servir tamién pa facenos reflexonar, al asturianismu como colectivu, ¿por qué nun consiguimos caltener estos mínimos avances? Nun podemos echar la culpa namás a los poderes, que tienen una parte perimportante de la culpa, nós tampoco ficimos too bien.
 
Los medios dixitales tendrán que cubrir l’espaciu que dexa agora Les Noticies, y habrá que caminar hacia una profesionalización mayor de los mesmos, puede facese un periodismu de calidá al traviés de la rede y amás puede llegase a más xente, el papel namás ye’l formatu.
 
¿Cuál ye’l papel que tan xugando los mass media asturianos pa cola nuesa llingua?
 
-Los medios de comunicación dan una presencia mui probe a la nuesa llingua, llindada polo xeneral a la información cultural y ensin nengún respetu pa cola toponimia oficial na mayor parte los casos. La política de sovenciones pa esta cuestión ta mui mal plantegada, nun consigue un usu tresversal ente les estremaes secciones del periódicu o en  programes distintos de les radios y televisiones. Pero’l casu más grave ye’l de los medios públicos. Nós nun entendemos una radiotelevisión pública asturiana si l’asturianu nun ye la so llingua vehícular, y lo mesmo pasa coles emisiones de RTVE n’Asturies, onde tovía hai menos presencia del asturianu que na RTPA.
 
¿Ye Internet una ferramienta valida pal desendolcu del asturianu?
 
-Ye una ferramienta perimportante y que demostró yá que podía facer muncho por una llingua minoritaria con pocos recursos como esta. Nesi sen ha destacase’l llabor d’organizaciones como Softastur o’l trabayu personal de los blogueros, ente otres iniciatives. Pero nun tenemos qu’escaecer que lanormalización d’un idioma ha facese a pie de cai.
 
¿Cuáles son los oxetivos que teneis marcaos en esta primera etapa como coleutivu?
 
-En primer llugar venimos a cambiar la mentalidá, nun queremos oyer más eso de “a ver cuándo nos dan la oficialidá”. Naide va regalanos nada, habrá que lluchar por cada pasu y por que nun se dean pasos atrás, la sociedá tien de ser la protagonista d’esti cambiu y concienciase del valor que tien l’idioma asturianu pal presente y pal futuru d’Asturies, dende’l puntu de vista indentitariu, cultural y económicu. Amás, queremos que la xente tome lainiciativa, ser una organización abierta a la collaboración y áxil, como lo ye lasociedá d’anguaño, una organización que seya un sofitu pa la xente que quier trabayar y non una torga.
 
¿Que tien que facer la xente pa ponese en contauto con vosotros?
 
-Pueden ponese en contauto con nós en contautu@s806295988.mialojamiento.es o na nuesa páxina web www.iniciativapolasturianu.org Amás tenemos perfiles en Facebook y en Twitter, onde pueden siguinos y falar con nós Tamos esperando la collaboración de tol mundu, dende tolos conceyos d’Asturies y dende fuera, porque tol mundu pue poner un granín d’arena pol futuru del asturianu.