Va unes selmanes Iniciativa pol Asturianu púnxose en contactu colos responsables de la información metereolóxica de la TPA p'avisar de dellos cambios na toponimia que nun se taben usando nel mapa del tiempu del informativu. Asina, dende va unos meses Bual, y dende va selmanes, L.luarca, cabeces de los conceyos de Bual y Valdés respectivamente, tienen la so denomación oficial namás n'asturianu, quedando derogada l'anterior.

Pocos díes dempués del nuesu avisu, respondiéronmos de forma positiva y nel tiempu de la TPA, al repasar el mapa, pueden vese yá les formes oficiales ensin cambiar a la forma yá derogada, como sí asocede con topónimos aprobaos de forma doble o naquellos que tovía nun tienen oficializada la forma tradicional.

Dende Iniciativa pol Asturianu quiximos aprovechar pa recordar que n'otros espacios onde collabora l'equipu del tiempu de RTPA sigue ensin usase la toponimia oficial, casu de los espacios de la RPA o'l programa de TPA "De hoy no pasa". Sicasí nun quiximos dexar d'espresar la nuesa felicitación pol pasu dau cola puesta en marcha del espaciu del tiempu n'asturianu dientro del informativu de la RPA de les 13 hores, onde David Arango y los sos compañeros vienen usando l'asturianu dende va unos meses con mui bon resultáu y acoyida del públicu.

 

Artículos venceyaosMás del autor